Në komunën e Malishevës u përuruan sot masat e efiçiencës së energjisë në një ndërtesë sociale ku jetojnë 25 familje, përfshirë tri gra kryefamiljare. Projekti është realizuar në kuadër të pakos emergjente të Bashkimit Evropian për Kosovën, me një investim prej 178,347 eurosh, shkruan Katror.info.
Ministrja në detyrë e Ekonomisë, Artane Rizvanolli, theksoi se ky investim është rezultat i mbështetjes së BE-së, pas kërkesës së Qeverisë së Kosovës në vitin 2022 për përballimin e krizës energjetike. “Qëllimi ynë ka qenë ulja e konsumit të energjisë në të gjitha shtresat e shoqërisë, përfshirë edhe popullatën dhe bizneset. Në këtë ndërtesë, kursimi i energjisë arrin deri në 79 për qind, duke siguruar një ambient më të shëndetshëm, më të ngrohtë dimrit dhe më të freskët verës,” tha Rizvanolli.
Ky është një nga 28 ndërtesat sociale në 13 komuna të Kosovës që po përfitojnë nga paketa emergjente e BE-së me vlerë 6 milionë euro, ku 90% financohet nga Bashkimi Evropian dhe 10% nga komunat përkatëse.
Mundesh me e lexu edhe...
Përfaqësuesi i Zyrës së BE-së në Kosovë, Alessandro Bianciardi, theksoi angazhimin e vazhdueshëm të BE-së për të mbështetur Kosovën në reformat dhe investimet drejt një tranzicioni të pastër energjetik dhe dekarbonizimit të sektorit.
Kryetari i Komunës së Malishevës, Ekrem Kastrati, vlerësoi projektin si një investim me përfitime të jashtëzakonshme për komunitetin, duke përmirësuar cilësinë e jetës dhe duke ulur ndjeshëm shfrytëzimin e energjisë./Katror.info
