Maratonistja dhe alpinistja nga Zvicra shënon një arritje historike në majën më të lartë të Alpeve, në ekspeditën e organizuar nga Klubi Alpin Prishtina.
Maja e Mont Blanc-ut, me një lartësi prej 4.808 metrash mbi nivelin e detit, është pika më e lartë e Alpeve dhe e Evropës Perëndimore, një simbol i guximit, këmbënguljes dhe ëndrrave që shikojnë drejt qiellit. Në këtë sfidë madhështore, Afërdita Gashi ka hyrë në histori si gruaja e parë shqiptare e diasporës që arriti ta pushtojë majën e këtij gjiganti malor.
Afërdita Gashi, e cila jeton në Zvicër, është e njohur si maratoniste dhe alpiniste me përvojë, duke u ngjitur rregullisht në majat më sfiduese të vendit. Për të, sporti dhe aktivitetet në natyrë nuk janë vetëm pasion, por mënyrë jetese, një disiplinë që ndërthur përgatitjen fizike, forcën mendore dhe dashurinë për lirinë që ofron mali.
Mundesh me e lexu edhe...
Ngjitja në Mont Blanc kërkon një nivel të lartë stërvitjeje dhe qëndrueshmërie, përballim të kushteve atmosferike të ashpra dhe aftësinë për të marrë vendime të shpejta në terren ekstrem. Për Afërditën, kjo arritje ishte kulmi i një rruge të gjatë përgatitjeje dhe përkushtimi.
“Në zemrën e stuhisë dhe mbi heshtjen e akullt, çdo hap dhe çdo frymëmarrje ia kushtova familjes sime. Ishte forca e dashurisë që më ngriti deri në qiell.”, shprehet Afërdita Gashi për Albinfo.ch.
Me këtë ngjitje, Afërdita Gashi jo vetëm që vendosi një rekord personal dhe kombëtar, por dha edhe një mesazh frymëzues për të gjitha gratë shqiptare, në vend dhe në diasporë se majat më të larta arrihen me guxim, këmbëngulje dhe dashuri të thellë për atë që bën.
Ekspedita u realizua për të katërtën herë nga Klubi Alpin Prishtina (KAP), nën udhëheqjen e guidës malore Kristian Gashi dhe me koordinimin e kryetrajnerit të KAP-it, Nazmi Hasnaramaj, një figurë e respektuar në komunitetin e alpinistëve shqiptarë. Në këtë sfidë drejt majës, krah alpinistëve të tjerë, mori pjesë edhe Ramush Haradinaj, duke e ndarë me grupin përvojën, vendosmërinë dhe emocionin e arritjes në kulmin e alpeve./Albininfo/Katror.info
