Sot është nënshkruar Memorandumi i Bashkëpunimit ndërmjet Shërbimit Spitalor dhe Klinik Universitar të Kosovës (SHSKUK) dhe Odës së Infermierëve, Mamive dhe Profesionistëve të tjerë Shëndetësorë të Kosovës (OIK). Marrëveshja u formalizua nga drejtori i përgjithshëm i SHSKUK-së, Elvir Azizi, dhe kryetarja e OIK-ut, Nexhmije Gori, shkruan Katror.info.
Ky memorandum shënon një hap të rëndësishëm në forcimin e bashkëpunimit institucional, me qëllim avancimin profesional të infermierëve, mamive dhe profesionistëve të tjerë shëndetësorë. Dokumenti parasheh mbështetje të përbashkët për edukim të vazhdueshëm profesional, shkëmbim të njohurive dhe përmirësim të kushteve të punës e cilësisë së shërbimeve shëndetësore në vend.
Përmes kësaj marrëveshjeje, palët angazhohen të krijojnë mundësi të reja për trajnim, specializim dhe zhvillim të kapaciteteve profesionale për infermierë të profileve të ndryshme, duke kontribuar në ngritjen e standardeve të kujdesit shëndetësor dhe ofrimin e shërbimeve më cilësore për qytetarët./Katror.info
