Ndërtesa gotike e shekullit të 12-të në Hamburg do të jetë nikoqire e debutimit në Gjermani të Korit të Filharmonisë së Kosovës. Kisha e Shën Pjetrit, e njohur në gjermanisht si “Hauptkirche St. Petri” në qendër të qytetit verior gjerman, është skena ku Kori do të interpretojë një program që prek ngjyra të ndryshme muzikore e po ashtu bashkon kultura. Muzika korale shqipe e ajo evropiane do të jenë prezantimi i parë i Korit të Filharmonisë së Kosovës në Gjermani. Por pas ditës së tetë të shtatorit, në të nëntën, ky ansambël do të prezantohet në perëndim të Federatës Gjermane, në Düsseldorf. Nën dirigjimin e Hajrullah Sylës, Kori do interpretojë vepra të kompozitorëve shqiptarë e ndërkombëtarë.
Ushtruesi i detyrës së drejtorit të Filharmonisë së Kosovës, Dardan Selimaj, ka thënë se në Hamburg dhe Düsseldorf, Kori do të prezantohet me një program ambicioz e të larmishëm që bashkon kultura, gjenerata dhe tradita.
“Koncerti vjen përpara hapjes së sezonit 2025/2026 në Prishtinë dhe Shkup, që njëherësh shënon koncertin qendror të shënimit të 25-vjetorit të themelimit të institucionit. Programi i Korit në Gjermani është kryesisht program i repertorit të ansamblit – krijimtaria e kompozitorëve të Kosovës në këto koncerte përfaqësohet nga gjenerata e dytë e kompozitorëve kosovarë (Halit Kasapolli) e deri te shkolla e re e kompozimit (Rafet Rudi, Mendi Mengjiqi, Baki Jashari)”, ka thënë ai. Sipas Selimajt, nga repertori botëror në program janë përfshirë vepra nga Ēriks Ešenvalds, Johannes Brahms, Jan Sandström, Michael Ostzryga e Jake Runestad.
Mundesh me e lexu edhe…
“Publiku besoj se do të përjetojë një mbrëmje të veçantë që përfaqëson rrugëtimi i Korit në këto vite. Koncertet do të mbahen në Kishën e Shën Pjetrit në Hamburg (Hauptkirche St. Petri – Hamburg) dhe Kishën e Shën Gertrudit në Düsseldorf”, ka thënë ai.
Kurse dirigjenti i Korit të Filharmonisë së Kosovës, Hajrullah Syla, ka thënë se Gjermania është një nga qendrat më të mëdha të muzikës klasike në botë dhe të jesh pjesë e skenës së saj do të thotë të prezantosh veten para një audience që e njeh dhe e vlerëson thellësisht muzikën klasike dhe artin në përgjithësi.
“Për Filharmoninë e Kosovës, paraqitja para publikut gjerman ka një rëndësi të veçantë, është një mundësi për të dëshmuar se jemi gati të komunikojmë gjuhën tonë muzikore me botën dhe të tregojmë se Kosova ka një skenë artistike që mund të qëndrojë krah për krah me nivelet më të larta evropiane”, ka thënë ai. Ka shtuar se beson që publiku do t’i mirëpresë dhe do të jetë shumë kureshtar gjatë gjithë koncertit.
“Ka gjithmonë një emocion të veçantë kur prezantohet diçka që nuk është dëgjuar më parë, sidomos kur ajo mbart tingujt, ritmet dhe ngjyrat e një kulture që jo gjithmonë është në qendër të vëmendjes. Muzika jonë përfshin elemente të rëndësishme të kulturës sonë, të ndërthurura me teknika bashkëkohore. Jam i bindur se kjo freski do të tërheqë vëmendjen e publikut dhe do të mbetet në kujtesën e tyre edhe pas mbylljes së koncertit”, ka thënë ai. Sipas Sylës, si çdo vit, Filharmonia e Kosovës ka plane për të performuar jashtë vendit. Ka treguar se deri në fund të këtij viti një nga paraqitjet më të rëndësishme do të jetë ajo në Vatikan.
“Pjesa tjetër e aktiviteteve do të zhvillohet kryesisht në Prishtinë, Shqipëri dhe Maqedoninë e Veriut. Për vitin 2026 planifikojmë një kalendar më të gjerë, me paraqitje të rëndësishme në vend dhe vende të tjera evropiane, duke vazhduar kështu misionin tonë për ta prezantuar kulturën muzikore të Kosovës në skenat më prestigjioze”, ka thënë Syla.
Filharmonia e Kosovës pjesën e parë të këtij viti kalendarik e ka pasur mjaft të ngjeshur. Ashtu pritet të jetë edhe sezoni i ri.
“Filharmonia e Kosovës do të hapë sezonin në Prishtinë më 26 shtator 2025 në Prishtinë, me interpretimin e premierës shqiptare në oratoriumin ‘Nëna Terezë’ nga Mendi Mengjiqi, nën dirigjimin e polaku Wojciech Czepiel”, ka treguar ushtruesi i detyrës së drejtorit të Filharmonisë, Dardan Selimaj.
Në mbyllje të sezonit të kaluar Filharmonia kishte bërë një bashkim të institucioneve të rëndësishme skenike. Filharmonia, Opera e Kosovës dhe Baletit Kombëtar të Kosovës kishin sjellë për publikun një nga veprat më madhështore të repertorit klasik botëror: kantatën skenike “Carmina Burana” të kompozitorit gjerman Carl Orff.
Me këtë vepër Filharmonia e Kosovës e kishte përmbyllur sezonin, përpara se ta sillnin edhe një vepër të komisionuar në fund të qershorit.
Nën dirigjimin e mjeshtrit japonez Toshio Yanagisawa, me koreografi origjinale të Toni Candeloros, me përfshirjen e solistëve ndërkombëtarë dhe një trupe të gjerë artistësh vendës, kjo shfaqje qe shndërruar në një moment të rrallë dhe historik për jetën kulturore të Kosovës. Të mbështjellë nga tingujt e fuqishëm të orkestrës dhe zërat e korit, publiku ka përjetuar një natë ku arti nuk ka qenë thjesht performancë, por një përvojë kolektive e lartësuar nga pasioni, përkushtimi dhe bashkimi institucional.
Në sallën gjysmë të errësuar të “AMC Hall”, skena është shndërruar në një univers të tensionit dramatik dhe harmonisë kolosale. Nga të dyja anët e saj, koristët kanë qëndruar në pozicione të lartësuara, të vendosur në formë amfiteatri, ndërsa në qendër Orkestra e Filharmonisë ka krijuar një strukturë të dendur tingujsh që është përhapur fuqishëm në ajër. Drita e zbehtë dhe tymi i lehtë i skenës kanë krijuar një ndjesi mesjetare e mitologjike, ndërkohë që trupa e baletit ka sjellë lëvizjen në mes të këtij peizazhi të ndërtuar me precizitet muzikor. Në sfond, një projektim fluid dhe abstrakt ka shtuar dimensionin vizual të veprës, duke bërë që çdo moment të duket si pjesë e një riti të madh të përbashkët. Publiku ka përjetuar një natë ku arti është bërë një përvojë kolektive që ka kapërcyer kufijtë e të zakonshmes.
Nën ritmet e Carl Orffit, me kantatën e kompozuar më 1936, bazuar në tekste të dorëshkrimeve të mesjetës, “Carmina Burana” është një ndër veprat më të njohura të muzikës klasike. Hapet dhe mbyllet me pjesën “O Fortuna”, një himn dramatik për pafuqinë njerëzore ndaj fatit. Midis këtyre kulmeve zhvillohen tema që prekin natyrën, dashurinë, epshin dhe jetën si festë e përkohshme. Këto përmbajtje kanë marrë jetë përmes një interpretimi shumëdimensional në skenën e Obiliqit./KOHA/Katror.info
