Organizata për mbrojtjen e natyrës EcoZ ka bërë thirrje urgjente për largimin e hidrocentraleve të ndërtuara ilegalisht brenda Parqeve Kombëtare të Kosovës, duke paralajmëruar për dëme serioze në lumenj dhe biodiversitet, raporton Ekonomia Online.
Drejtoresha ekzekutive e EcoZ, Egzona Shala Kadiu, tha se situata është alarmante si në Parkun Kombëtar “Sharri” ashtu edhe në “Bjeshkët e Nemuna”. Sipas saj, në “Sharri” janë ndërtuar katër hidrocentrale, me kapacitet nga 9.5 deri në 4.5 MW, të cilat devijojnë rreth 90% të rrjedhës së lumenjve, duke e futur mbi 5 mijë metra të tyre në gypa. Në “Bjeshkët e Nemuna”, tre hidrocentrale të tjera funksionojnë në mënyrë të ngjashme, po ashtu pa leje dhe në kundërshtim me ligjin.
“Koncerti Dam the Dams që do të mbahet nesër në Brezovicë nuk është vetëm një koncert, por një thirrje për të ndalur shkatërrimin e lumenjve tanë dhe për të larguar objektet ilegale nga parqet kombëtare”, tha Shala Kadiu. Ajo u bëri thirrje institucioneve të reja që do të formohen të trajtojnë me prioritet këtë çështje, duke rikthyer rrjedhën e lirë të lumenjve Lepenc e Lumbardh.
Mundesh me e lexu edhe…
Ngjarja Dam the Dams do të zhvillohet më 16 gusht 2025 në Parkun Kombëtar “Sharri”, dhe do të përfshijë panair të produkteve lokale, ecje në natyrë dhe koncert me artistë të njohur, me synimin për të mbrojtur parqet kombëtare nga aktivitetet e paligjshme.
Sipas EcoZ, hidrocentralet janë ndërtuar pa leje mjedisore, pa vlerësim të ndikimit në mjedis dhe pa përfshirjen e komuniteteve lokale, duke shkelur disa ligje kombëtare, përfshirë ligjet për ujërat e Kosovës dhe për mbrojtjen e parqeve kombëtare./Katror.info
