Ushtruesi i Detyrës së Drejtorit të Përgjithshëm të Radio Televizionit të Kosovës, Hysen Hundozi, ka njoftuar se për shkak të mungesës së buxhetit të RTK-së, rrjedhimisht mungesës së pagave për rreth 700 punëtorë të mediumit publik, kanë vendosur të aplikojnë për kredi në Ministrinë e Financave.
Hundozi u është drejtuar kolegëve të tij duke ju thënë se menaxhmenti i RTK-së nuk është ndalur së kontaktuari institucionet vendore e ndërkombëtare, për të gjetur një zgjidhje alternative për tejkalim të situatës.
“Për shkak të pamundësisë për të komunikuar drejtpërdrejt me themeluesin tonë, Kuvendin e Kosovës, ne iu kemi drejtuar Qeverisë së Republikës së Kosovës, me të cilën kemi shqyrtuar të gjitha mundësitë për tejkalimin e gjendjes” – ka shkruar mes tjerash Hundozi.
Mundesh me e lexu edhe…
Sipas tij, janë shqyrtuar alternativa të shumta deri në arritjen e një modaliteti të ligjshëm që munëson ndihmën e Qeverisë për RTK-në deri në konstitum të Kuvendit.
“Kërkesa jonë zyrtare për kredi është dorëzuar në Ministrinë e Financave dhe ajo po trajtohet me prioritet. Presim që shumë shpejt ajo të realizohet, në mënyrë që ne të vazhdojmë normalisht punën tonë” – ka deklaruar tutje Hundozi.
Hundozi ka falënderuar kolegët që i kanë besuar përpjekjeve të menaxhmentit për dalje nga situata, derisa ka kërkuar durim dhe mirëkuptin gjatë kësaj periudhe.
Sindikata e Punëtorëve të RTK-së (SPERTK), në ndërkohë ka dalë me njoftim se mbështetë nismën për protestë të disa kolegëve të RTK-së që nuk janë pjesë e asnjë sindikate.
Protesta planifikohet të fillojë në ora 09:30 të datës 18.08.2025.
“Bëjmë thirrje pa dallim që të gjithë punëtorët të dalin dhe të mbështesin çdo protestë për të drejtat e punëtorëve dhe mbrojtjen e mediumit publik” – thuhet në njoftimin e SPERTK.
Kjo Sindikatë ka njoftuar që aktivitetet sindikale nuk do të ndalen deri në arritjen e qëllimeve.
“Vërejtje: Nëse pagat dalin në llogari para ditës së protestës, atëherë do të dërgohet njoftimi për anulimin e saj” – thuhet tutje në njoftim.
Qeveria e Kosovës kishte miratuar kërkesën për dhënien e një kredie deri në 10 milionë euro për Ndërmarrjen publike “Infrakos”.
Kjo hua ka për qëllim të ndihmojë Kompaninë që të përballojë obligimet financiare që rrjedhin nga Projekti për rehabilitimin e linjës hekurudhore 10.
Ministri në detyrë i Financave Hekuran Murati gjatë mbledhjes së Qeverisë më 27.06.2025 pati dhënë arsyetimin për këtë vendim.
“Si Ministri kemi pranuar kërkesë nga Ndërmarrja ‘Infrakos’ për një kredi deri në 10 milionë euro për të siguruar likuiditetin e nevojshëm, në mënyrë që të vazhdohet tutje me mbulimin e detyrimeve financiare. Pra, që rrjedhin nga Projekti që është aktualisht në zbatim: rehabilitimi i hekurudhës – linja 10.” – deklaroi Murati.
Disa punëtorë të Radiotelevizionit të Kosovës (RTK) kanë protestuar, më 06.08.2025 para Kuvendit të Kosovës, për shkak të mosalokimit të buxhetit për RTK-në dhe mungesën e pagave për 700 punonjësit e mediumit publik.
“Data 5 gusht ka kaluar dhe punëtorët e RTK-së ende nuk i kanë marrë pagat e tyre. Buxheti i RTK-së ende nuk është alokuar çka përbën shkelje të drejtpërdrejtë të Ligjit të Punës dhe një goditje ndaj dinjitetit të qindra punëtorëve të këtij institucioni”- ka deklaruar Gëzim Bimbashi, kryetar i Sindikatës së Punëtorëve të RTK-së.
Për situatën në RTK, kryeministri në detyrë, Albin Kurti, foli më po atë datë, duke thënë se dëshiron zgjidhje.
Kurti ka përmendur ndarjen buxhetore për radiotelevizionin publik në vitin 2021 kur kryeministër asokohe ishte Avdullah Hoti.
Sipas Kurtit, ajo ndarje ishte bërë në mënyrë joligjore. Për këtë arsye Kurti tha se nuk e ka ndërmend ta ndjekë atë rrugë.
Kurti ka thënë se ka pasur takime në këtë drejtim, megjithatë nuk ka treguar se çfarë rezultatesh janë nxjerrë nga ato takime teksa iu përgjigj gazetarëve se “duhet t’i pyesni ata që janë takuar”.
“RTK është themeluar nga Kuvendi dhe i jep llogari atij. Ne jemi për ta gjetur një zgjidhje dhe jemi për pjesëmarrje aktive në gjetjen e një zgjidhje, por nuk mund të jetë ajo një zgjidhje që nuk është ligjore. Komisioni për Buxhet do duhej ta marrë vendimin për transferim të mjeteve. Duke mos pasur legjislaturën e nëntë, nuk e kemi as atë komision, rrjedhimisht nuk e kemi as atë vendim” – kishte deklaruar Kurti.
Pas këtij deklarimi të kryeministrit në detyrë, ka reaguar ish-kryeministri Avdullah Hoti, i cili ka theksuar se vendimi i vitit 2021 për ndarje buxhetore për RTK-në ka qenë “plotësisht ligjor”.
“Buxheti i vitit 2021 ka qenë i miratuar. Vendimi i atëhershëm i Qeverisë ka paraparë hapat që duhej të ndiqeshin deri në vendimin e Komisionit Parlamentar për Buxhet dhe Financa. Kështu që deklarimi i sotëm i Kurtit lidhur me atë vendim është tentim për mashtrim të opinionit”- shkroi Hoti në profilin e tij në Facebook.
