Rrafshi i Dukagjinit, i njohur për tokat pjellore dhe bukuritë natyrore, prej dekadash ka qenë një ndër zonat më të begata të bujqësisë kosovare. Në Rashiq të Pejës, bujku Xhavit Shala është shembull i përkushtimit ndaj punës në arë dhe blegtori, duke e mbajtur gjallë traditën e bujqësisë familjare.
Shala kultivon një sipërfaqe prej 6 hektarësh, prej të cilëve 3 hektarë me misër dhe 3 hektarë me grurë. Përveç kësaj, ai ka mbjellë rreth 10 ari me speca, si dhe kultura të tjera si patate, lakra e fasule. Vetëm nga fasulet, për të cilat një pjesë e arës është punuar me dorë, ai pret të sigurojë mbi 1000 kilogramë prodhim.
“Krejt i kam 6 hektarë të mbjellë, 3 janë misër dhe 3 janë grurë, 10 ari janë speca, pastaj patate lakra e kështu me radhë, çka janë perime, tana i mbjelli. Sivjet jam i kënaqur me prodhim 100%. Ka dashtë Zoti ka falë bereqet”, tha Shala për RTK-në, i cili një arë thotë se e ka prashitur krejt me shati të dorës, e prej saj pret edhe 1000 kg fasule.
Mundesh me e lexu edhe...
Edhe specat e llojit ‘somborkë’ janë në gjendjen më të mirë dhe që të gjitha janë bio thotë Xhaviti.
“Krejt janë bio, pa spërkatje janë, vetëm ushqim foljarë janë fletëve, nuk kanë kurrfarë pesticide, vetëm si i ka falë Zoti natyral”, shtoi ai.
Mirëpo Shala është shprehur shumë i brengosur që toka po punohet gjithnjë e më pak, sepse, sipas tij, të rinjtë po largohen nga Kosova.
“Edhe këtu në Kosovë ka punë boll, nëse duam të punojmë s’kemi nevojë fare me dalë jashtë as në Gjermani, as në Zvicër. Këtu ka punë boll, të gjitha të mirat i kemi. Kush don të punojë, tana i kemi në Kosovë. Aq shumë unë kam vullnet, sa që nuk më merr as gjumi për me ardhë te ara me e këqyrë”, tha Shala.
Krahas gjithë kësaj pune në prodhimtarinë e perimeve, fermeri Xhavit Shala nuk po e lë anash as blegtorinë. Në stallën e re, të cilën e ka ndërtuar vet, ai ka edhe 10 krerë gjedhe, shumica prej të cilave lopë qumështore./RTK/Katror.info
