Kur planifikojnë pushimet, shumë njerëz fokusohen te vizitat në destinacionet më të famshme, restorantet e njohura dhe përfshirja e sa më shumë aktiviteteve në itinerar. Por sipas teorisë “Blue Mind”, sekreti i një udhëtimi vërtet relaksues mund të mos jetë “sa shumë bëni”, por sa afër ujit ndodheni.
“Blue Mind” është ideja se të qëndruarit pranë ujit, det, liqen apo lumë ka një efekt qetësues mbi trurin, ul stresin dhe pastron mendjen nga zhurma e përditshme. Leigh Barnes nga Intrepid Travel shprehet se pranë ujit ndihesh sikur bën një frymëmarrje të thellë lehtësuese, shkruan TAR.
Po ashtu, blogerja e udhëtimeve Esther Susag beson se kjo është arsyeja pse ndihesh i çlodhur pranë detit ose pas notit në liqen, nuk ka të bëjë me turizëm aktiv, por me rigjetjen e qetësisë së brendshme. Studimet e mbështesin këtë ide, duke treguar se afërsia me ujin ul ritmin e rrahjeve të zemrës, redukton ankthin dhe rrit ndjenjat e mirëqenies, madje pa qenë e nevojshme të hysh në ujë.
Mundesh me e lexu edhe…
Përfitimet e pushimeve pranë ujit janë të shumta.
Uji tërheq natyrshëm, ndihmon të shkëputesh nga zhurma e teknologjisë dhe të përqendrohesh te e tashmja. Ky trend ka rritur kërkesën për aktivitete si kajak, snorkeling, ecje përgjatë bregdetit apo zhytje në gjire të fshehura.
Ky lloj udhëtimi është veçanërisht rigjenerues pas periudhave të ngarkuara pune ose pas përjetimit të burnout-it. Mike Larragueta nga Visit Reno Tahoe shton se nuk nevojiten shuma të mëdha monetare, mjafton të kesh pranë një liqen, lumë, pishinë apo burim termal për të përjetuar efektin qetësues.
Megjithatë, ky stil pushimi nuk është për të gjithë. Ata që preferojnë një axhendë të mbushur mund ta kenë të vështirë të pranojnë ritmin e ngadaltë dhe momentet pa plan.
Për të përfituar maksimalisht nga “Blue Mind”, ekspertët rekomandojnë të zgjidhni vende ku uji është pjesë e pandashme e përvojës dhe të vendosni qëllimisht momente të pakushtëzuara: një not çdo mëngjes, shikimin e lindjes ose perëndimit të diellit mbi det, lexim në kuvertë ose thjesht vështrimin e horizontit. Barnes sugjeron edhe ture të vogla me guida lokale për të shmangur stresin e planifikimit.
Në thelb, teoria “Blue Mind” na kujton se ndonjëherë pushimet më të mira nuk maten me sa shumë bëjmë, por me sa thellë ndjejmë qetësinë dhe shpesh, kjo qetësi gjendet pranë ujit. /Katror.info
