Korporata Energjetike e Kosovës (KEK) ka njoftuar zyrtarisht fillimin e punimeve ndërtimore për projektin Solar4Kosovo I – Centrali Fotovoltaik, një ndër projektet më të rëndësishme për tranzicionin energjetik të vendit.
Ky projekt financohet nga Bashkimi Evropian përmes Kornizës së Investimeve për Ballkanin Perëndimor (WBIF), Qeveria Gjermane përmes KfW si institucion kryesor financiar, Banka Evropiane për Investime (BEI), si dhe vetë KEK-u.
Punimet do të zhvillohen në afërsi të Termocentralit “Kosova A”, në zonën që shtrihet ndërmjet komunës së Obiliqit dhe Fushë Kosovës, duke përfshirë banorët e Kryshevcit (Dardhishtë) dhe lagjes Mërlak në fshatin Kryshevc.
Mundesh me e lexu edhe...
Sipas KEK-ut, ky hap shënon fillimin e një transformimi të rëndësishëm drejt prodhimit të energjisë nga burime të ripërtëritshme dhe të qëndrueshme. “Projekti do të kontribuojë ndjeshëm në një të ardhme më të gjelbër për Kosovën”, thuhet në njoftim.
KEK ka bërë të ditur gjithashtu se përdoruesit e paautorizuar të tokës në zonën e projektit janë lejuar deri më tani të zhvillojnë aktivitete bujqësore, për shkak të mungesës së një plani zhvillimor konkret. Megjithatë, sezoni bujqësor i vitit 2025 shënon të fundit për këtë përdorim, pasi toka do të shfrytëzohet për ndërtimin e centralit fotovoltaik. Pas gushtit 2025, nuk do të lejohet më asnjë aktivitet i paautorizuar në këtë zonë.
Për transparencë dhe informim të drejtë, KEK paralajmëron se zona e projektit do të rrethohet me gardh sigurie dhe do të pajiset me tabela njoftuese. Kompania ka ftuar të gjithë përdoruesit e tokës dhe personat e prekur nga vendimi që, për çdo sqarim apo informacion shtesë, të kontaktojnë përfaqësuesit e saj në numrin +383 44 284 594 ose në adresën e emailit avni.shala@kek-energy.com/Katror.info
