Shkencëtarët kanë zbuluar se nostalgjia mund të ketë edhe efekt qetësues fizik, duke reduktuar ndjeshmërinë ndaj dhimbjes. Një studim i publikuar në revistën JNeurosci tregon se ndjenja nostalgjike ul aktivitetin në zonat e trurit që lidhen me përpunimin e dhimbjes. Pjesëmarrësve iu treguan 26 imazhe nostalgjike ndërkohë që ishin të lidhur me aparatin fMRI. Paralelisht, ata ekspozoheshin ndaj impulseve të dhimbjes nga një gjenerator nxehtësie të vendosur në kyçin e dorës.
Rezultatet treguan se personat që shikonin skena nga e kaluara e tyre, si lojërat në oborrin e shkollës, vizatimet e njohura televizive apo ushqimet e fëmijërisë, raportonin nivel më të ulët dhimbjeje, krahasuar me ata që shihnin imazhe moderne neutrale. Imazhet e hidhura dhe të ëmbla gjithashtu reduktuan aktivitetin në dy pjesë të trurit, të njohura si të përfshira në perceptimin e dhimbjes; gyrusi gjuhësor i majtë (një rrudhë në sipërfaqen e korteksit që lidhet me përpunimin vizual e gjuhësor) dhe gyrusi parahipokampal (strukturë pranë hipokampusit që luan rol në kujtesë dhe emocione), shkruan TAR.
Një rajon tjetër i quajtur talamus u zbulua gjithashtu se luante një rol në transmetimin e informacionit të nostalgjisë në pjesët e trurit që lidhen me perceptimin e dhimbjes. Sipas prof. Huajian Cai nga Akademia Kineze e Shkencave, nostalgjia është një emocion kryesisht pozitiv që shërben si mekanizëm adaptues, duke përfshirë edhe një efekt analgjetik të natyrshëm. “Paradigma e nostalgjisë reduktoi ndjeshëm perceptimin e dhimbjes, veçanërisht në intensitet të ulët”, shpjegon ai.
Mundesh me e lexu edhe…
Shkencëtarët theksojnë se ky emocion i fuqishëm mund të përdoret si metodë jo-farmakologjike për të lehtësuar dhimbjet e lehta apo të moderuara, si dhimbjet e kokës, tensionet muskulore, lodhjen nga stresi kronik. Psikologët po ashtu shtojnë se nostalgjia ndihmon në forcimin e identitetit personal dhe krijon ndjenja sigurie emocionale në periudha të pasigurta. Për këtë arsye, ajo shihet si një mekanizëm natyral vetëmbrojtës i trurit. /Katror.info
