Poeti shqiptar Plator Gashi shënon një moment të veçantë në karrierën e tij, pasi një vjershë e tij e përkthyer në italisht u vendos në disa bilborde publike në komunën Anacapri të ishullit Capri dhe në Napoli, si pjesë e instalacionit publik “Manifesto | Blue With No Sky” nga artisti Sislej Xhafa, në kuadër të Festival del Paessagio 2025.
Gashi shprehet me ngazëllim dhe mirënjohje ndaj Xhafës për mundësinë që ia dha për të qenë pjesë e këtij instalacioni unik, ku bashkë me të shfaqen edhe vargjet e poetëve Sarandë Haziri, Hortense Raynal, Luigi Socci dhe Ali Podrimja.
“Kur i shoh fjalët e mia me shkrim kaq të madh e kaq të ekspozuara, edhe gëzohem, edhe frikësohem. Thjesht kam shpresë që kushdo që i sheh, të reflektojë mbi brishtësinë, shkurtësinë dhe bukurinë e përvojave tona,” shkruan Gashi. Ai shpjegon se vjersha e tij i kushtohet “dritëzës shumëngjyrshe mes asaj hapjes e mbylljes së beftë të syve që e quajmë jetë.”
Mundesh me e lexu edhe…
Festival del Paessagio, i cili hapet nesër më 6 shtator, do të zhvillohet në Villa San Michele, Anacapri dhe do të qëndrojë i hapur deri më 3 nëntor. Sislej Xhafa do të paraqesë gjithashtu veprën e tij të dytë, “The Flag Project | Rusted Breath”, e cila do të jetë e vendosur në kopshtin hyrës të vilës nga 5 shtatori.
Për më shumë informacion mbi festivalin, vizitoni www.festivaldelpaesaggio.com
/Katror.info
