Sot, Instituti GAP publikoi raportin e ri “Letërnjoftimi i Komunave 2025”, i cili paraqet trendin e zhvillimeve kryesore në 38 komunat e Kosovës, duke përfshirë fusha si demografia, territori, arsimi, mirëqenia sociale, administrata, buxheti, ndërmarrësia, shërbimet publike dhe transparenca.
Gjetjet tregojnë ndryshime të theksuara demografike, ekonomike dhe sociale. Rënia e përgjithshme e popullsisë, migrimi i brendshëm drejt zonave urbane, numri i lartë i banesave/ndërtesave të pashfrytëzuara, ndryshimet në numrin e nxënësve dhe personelit arsimor, si dhe faktorë tjerë të ngjashëm, reflektojnë ndryshimet e shpërndarjes së banorëve brenda komunave të Kosovës. Ndërkaq, ndonëse vlera e buxhetit të komunave ka shënuar rritje graduale gjatë dekadës së fundit, të hyrat vetanake mbeten të ulëta dhe niveli i borxheve të pambledhura vazhdon të jetë i lartë. Po ashtu, shpenzimet e komunave si pasojë e obligimeve përmbarimore dhe gjyqësore janë dyfishuar vetëm në një vit, duke krijuar presion shtesë mbi financat komunale.
Në fushën e ndërmarrësisë, komunat e mëdha vazhdojnë të jenë qendra kryesore ekonomike duke gjeneruar pjesën më të madhe të qarkullimit të bizneseve, si dhe regjistrimit të bizneseve të reja.
Mundesh me e lexu edhe…
Raporti gjithashtu evidenton hendekun gjinor në pozita udhëheqëse në komuna. Përkundër disa përmirësimeve në transparencën buxhetore dhe rritjes së përgjithshme të punësimit, performanca e komunave në fusha kyçe mbetet e ulët. Këto gjetje dëshmojnë nevojën për politika më gjithëpërfshirëse dhe efektive për planifikim më të qëndrueshëm lokal.
Ky raport është pjesë e një serie të raporteve të cilat publikohen nga viti 2009 e të cilat ofrojnë të dhëna të krahasueshme ndër vite dhe ndërmjet fushave të ndryshme të nivelit lokal./EO/Katror.info
