Inteligjenca Artificiale (IA) po transformon marketingun me shpejtësi marramendëse, nga mjetet gjeneruese që hartojnë fushata të plota reklamash, te chatbot-ët që menaxhojnë kërkesat e klientëve. Kjo ka shtuar pasiguritë për të ardhmen e roleve njerëzore. Një studim i Stanford-it tregoi se IA po redukton mundësitë e punës në disa sektorë, veçanërisht për punëtorët e rinj.
Megjithatë, ndërsa detyrat rutinë po automatizohen, disa role të marketingut mbeten thelbësore dhe po fitojnë më shumë vlerë kur kombinohen me teknologjinë. Ja cilat janë pesë prej tyre:
1. Specialistët SEO
Kërkimi mbetet shtylla kurrizore e marketingut digjital. Bizneset garojnë për dukshmëri (visibility) dhe specialistët sigurojnë, që faqet të renditen aty ku ka më shumë rëndësi.
Mundesh me e lexu edhe…
SEO moderne shkon përtej fjalëve kyçe, duke përfshirë optimizimin teknik, kërkimin me zë dhe ndërtimin e autoritetit me lidhje cilësore. Algoritmet ndryshojnë vazhdimisht, dhe vetëm strategjia njerëzore mund t’i përshtatë ato me objektivat e biznesit.
2. Analistët e të dhënave në marketing
IA përpunon volum të madh të dhënash, por duhen analistë për t’i interpretuar dhe për t’i kthyer në vendime.
Analistët zbulojnë modele dhe i lidhin me sjelljen e klientëve, duke rritur kthimin nga investimet. Për shkak se kompanitë janë nën presion të tregojnë efektivitet, analistët do të mbeten shumë të kërkuar.
3. Strategët e përmbajtjes
Edhe pse IA po prodhon masivisht tekste, imazhe e video, strategët njerëzorë përcaktojnë mesazhin e duhur, audiencën e synuar dhe përputhshmërinë me vlerat e markës.
Ata menaxhojnë kalendarët editorialë dhe zgjedhin platformat, duke siguruar që përmbajtja të jetë e besueshme dhe të nxisë inovacion. Vetëm njerëzit mund të ndërtojnë narrativa dhe të interpretojnë nuancat kulturore.
4. Menaxherët e marketingut digjital
Këta profesionistë drejtojnë fushata nga reklamat në rrjete sociale te email-et. Ndërsa IA automatizon pjesë të procesit, menaxherët përcaktojnë buxhetet, drejtimin krijues dhe monitorojnë kthimin e investimeve. Në një klimë ku çdo shpenzim marketingu kërkon justifikim, aftësia për të integruar strategjinë, kreativitetin dhe financat mbetet jetike.
5. Menaxherët e markës
Ata kujdesen për reputacionin dhe pozicionimin e kompanisë. Në një epokë ku një gabim bëhet viral brenda minutave, mbikëqyrja njerëzore është e pazëvendësueshme.
IA ndihmon në monitorim, por vendimet mbi mesazhet dhe marrëdhëniet me klientët kërkojnë gjykim njerëzor. Raportet tregojnë se përvoja pozitive e klientit lidhet drejtpërdrejt me rritje financiare, duke e bërë rolin e tyre edhe më të vlefshëm.
IA nuk po zhduk punët, por po rrit rëndësinë e aftësive njerëzore si strategjia, kreativiteti dhe gjykimi. Duke kombinuar aftësitë njerëzore me mjetet e IA dhe me përditësimin e vazhdueshëm profesional, karriera në marketing jo vetëm që mbijeton, por lulëzon. /shqip.al/Katror.info
