Nën logon e shtëpisë botuese “Artini” nga Prishtina, sapo ka dalë nga botimi romani “Polifoni e mendjeve të lira”, i autorit, Ilir Shaqiri.
Sipas fjalës së redaktorit, ky roman i përket “dykuptimësisë”, dhe shkon kah romani “politik-alegorik, apo poetik-filozofik”. “Me këtë roman, Ilir Shaqiri, siç duket, nuk e ka për objektiv parësor të rindërtojë ngjarje apo histori, por ta grish lexuesin drejt përjetimeve dhe ndjesive që ato ngjarje dhe histori lënë pas, sepse ai i beson motos së letërsisë së realizmit psikologjik, sipas së cilës vlera e një romani të mirë nuk është tek drama që rrëfen, por tek ndërgjegjja që zbulon”, ka shkruar redaktori, Arben Veselaj.
Kurse sipas fjalës së recensentit, autori Shaqiri gërsheton pikëpamjet e filozofisë me artin, duke e futur lexuesin në një rrëfim mbresëlënës me terma muzikorë. “Romani është i strukturuar mbi një shumëzërësh të imagjinuar, ku personazhet funksionojnë si role në një këngë të pambarimtë polifonike: marrësi, prerësi, hedhësi, isoja bazë, e lartë, përforcuese dhe ajo e lëvizshme”, ka shkruar recensenti, Korab Shaqiri.
Mundesh me e lexu edhe…
Ilir Shaiqiri, përveç si njëri nga kantautorët më të shquar shqiptarë të kohës sonë, është i njohur edhe për disa vepra të suksesshme nga fusha e letërsisë imagjinatave, e studimeve letrare, kinematografisë dhe muzikologjisë. Para këtij romani ai ka botuar edhe këta tituj librash: “Estetika dhe semiotika në krijimtarinë artistike të nënës” (punim shkencor, Prishtinë, 2014), “Tan Temali” (roman, Tiranë, 2014), “Lemza e dheut” (roman, Prishtinë, 2016), “Adem Jashari” (poemë, Prishtinë, 2018), “ITH” (përmbledhje poetike, Tiranë, 2019), “Kangjelet” (skenar për film artistik, Prishtinë, 2016), “Kumti i kapelave” (skenar për film artistik, Prishtinë, 2021), “I miri i motrës” (libret për kantatën e kompozitorit Korab Shaqiri, Shkup, 2018)./Katror.info
