Banka Qendrore e Republikës së Kosovës (BQK) dhe Banka Qendrore Evropiane (BQE) kanë nënshkruar një Marrëveshje Bashkëpunimi për luftimin e falsifikimit të kartëmonedhave euro, duke forcuar përkushtimin institucional për ruajtjen e integritetit të parasë së gatshme dhe stabilitetin financiar të vendit. Marrëveshja u nënshkrua nga Guvernatori i BQK-së, z. Fehmi Ismaili, dhe Presidentja e BQE-së, znj. Christine Lagarde.
Sipas marrëveshjes, BQK do të ketë qasje në mekanizmat operativë të BQE-së për parandalimin dhe luftimin e falsifikimit të euros, si dhe do të integrohet në rrjetin profesional të bashkëpunimit me bankat qendrore të Eurosistemit dhe institucionet partnere rajonale.
Ky bashkëpunim është rezultat i përpjekjeve ndërinstitucionale në Kosovë, të udhëhequra nga BQK, në koordinim me Zyrën e Bashkimit Evropian, dhe synon të krijojë një kornizë gjithëpërfshirëse kundër falsifikimit, përfshirë themelimin e Qendrës Kombëtare Kundër Falsifikimit dhe Sistemit Kombëtar për Monitorimin e Falsifikimeve.
Mundesh me e lexu edhe…
BQK vlerëson rolin e ekspertëve dhe partnerëve ndërkombëtarë, veçanërisht BQE-në, për avancimin e kapaciteteve institucionale, teknike dhe operacionale, në një përpjekje të përbashkët për të garantuar sigurinë e parasë në Kosovë./Katror.info
