Banka Qendrore e Republikës së Kosovës (BQK) ka miratuar Rregulloren për Licencimin e Operatorëve të Shërbimeve të Kripto-Aseteve, duke hedhur hapin e parë drejt krijimit të një tregu të rregulluar dhe transparent për kripto-asetet në vend, shkruan Katror.info.
Ky vendim vjen në kuadër të përgjegjësive që dalin nga Ligji Nr. 08/L-295 për Kripto-Asete dhe parasheh rregullimin gradual të këtij sektori në përputhje me standardet ndërkombëtare.
Rregullorja e re përcakton kriteret për aplikim, marrjen dhe mirëmbajtjen e licencës, qeverisjen korporative, kërkesat për kapital, ruajtjen e fondeve të klientëve, transparencën dhe ndershmërinë në ofrim të shërbimeve, si dhe masa kundër pastrimit të parave dhe financimit të terrorizmit. Po ashtu, përfshihen edhe dispozita për masat korrigjuese dhe administrative që synojnë mbrojtjen e interesit të qytetarëve dhe stabilitetit financiar.
Mundesh me e lexu edhe…
BQK ka njoftuar se do të organizojë një punëtori prezantuese, ku do të shpaloset korniza ligjore dhe qasja rregullatore për kripto-asetet. Palët e interesuara ftohen të shprehin interesin e tyre përmes e-mailit në adresën: [email protected]
, ndërsa detajet e organizimit do të komunikohen më vonë.
Ky hap shënon fillimin e procesit të licencimit të operatorëve të kripto-aseteve në Kosovë, i cili pritet të pasohet nga zhvillime të tjera rregullative dhe mbikëqyrëse./Katror.info
