Rrëqebulli i Ballkanit, një nënlloj i rrëqebullit evropian, është në prag të zhdukjes me më pak se 50 individë të mbetur në pyjet e Maqedonisë së Veriut, Shqipërisë dhe Kosovës, të gjitha vende që synojnë anëtarësimin në Bashkimin Evropian.
Më 24 shtator, Parlamenti Evropian organizoi një ngjarje nën kujdesin e EuroNatur dhe eurodeputetëve Sebastian Everding dhe Thomas Waitz, ku u diskutua rëndësia e mbrojtjes së specieve dhe bashkëpunimi ndërkufitar për ruajtjen e rrëqebullit.
Në fokus të diskutimeve ishin: Përgjegjësia evropiane për mbrojtjen e rrëqebullit, rëndësia e ruajtjes së specieve në vendet kandidate për anëtarësim, bashkëpunimi ndërkufitar dhe roli i zonave të mbrojtura si Parku Kombëtar Mavrovo në Maqedoninë e Veriut.
Mundesh me e lexu edhe…
Eurodeputeti Sebastian Everding theksoi se Parlamenti Evropian ka përgjegjësi për të siguruar që biodiversiteti të mos neglizhohet gjatë procesit të zgjerimit. Drejtori Ekzekutiv i EuroNatur, Gabriel Schwaderer, shtoi se zonat e mbrojtura janë gurthemel i çdo strategjie efektive, duke vënë në pah sfidat e prerjeve të paligjshme në Mavrovo.
Viktor Berishaj, moderator i ngjarjes dhe Oficer Politik i EuroNatur, nënvizoi se bashkëpunimi ndërmjet vendeve është kyç, pasi rrëqebulli lëviz ndërkufitarisht. Thomas Waitz përfundoi ngjarjen duke thënë se mbijetesa e rrëqebullit do të jetë një tregues i seriozitetit të BE-së në procesin e zgjerimit: “Ky specia është simbol jo vetëm i asaj që mund të humbasim, por edhe i asaj që mund të mbrojmë së bashku.”/Katror.info
