KQZ mori vendim për miratimin e procedurës së veprimit në Qendrat Komunale të Numërimit për Zgjedhjet Lokale 2025. Me anë të kësaj procedure, përcaktohet themelimi, funksionimi dhe menaxhimi i QKN-ve, duke përfshirë mbikëqyrjen, pranimin e materialeve zgjedhore, numërimin e fletëvotimeve dhe verifikimin e rezultateve nga formularët e plotësuar në vendvotime.
Komisioni Qendror i Zgjedhjeve (KQZ) ka marrë vendim për emërimin e më shumë se 520 ekipeve të numërimit në Qendrat Komunale të Numërimit, me mbi 2 mijë anëtarë në total.
Sipas Ligjit për Zgjedhjet e Përgjithshme, në Zgjedhjet Lokale, numërimi i votave për kandidatët për Kryetarë të Komunave dhe për subjektet politike që garojnë për Kuvendet Komunale bëhet në vendvotime pas përfundimit të procesit të votimit, dhe të dhënat përkatëse evidentohen në formularë të posaçëm. Ndërkaq, sipas të njëjtit ligj, votat për kandidatët për anëtarë të Kuvendeve Komunale numërohen në Qendrat Komunale të Numërimit – një proces që realizohet përmes ekipeve të numërimit.
Mundesh me e lexu edhe...
Përveç numërimit të votave për kandidatët për Kuvendet Komunale, në këto qendra, sipas aktit nënligjor të KQZ-së – Rregullores Zgjedhore nr. 16/2024 për Qendrat Komunale të Numërimit – do të bëhet edhe verifikimi i votave të subjekteve politike, bazuar në formularët e plotësuar në vendvotime pas numërimit të fletëvotimeve. /RTK/Katror.info
