Londër — Inteligjenca artificiale gjenerative, e cila që nga viti 2022 ka shkaktuar frikëra të mëdha për humbje masive të vendeve të punës, nuk ka sjellë ende tronditje në tregun amerikan të punës, sipas një studimi të ri nga një qendër kërkimore në Universitetin Yale.
Studimi vjen mes shqetësimeve të përhapura se përdorimi i AI-së nga kompanitë amerikane do të çojë në shkurtime të stafit për shkak të automatizimit. Por të dhënat tregojnë se që prej lansimit të ChatGPT, nuk ka pasur ndryshime të dukshme në shpërndarjen e punëtorëve në treg, shkruan CNN, transmeton Katror.info.
“Duke matur këtë periudhë kur AI gjenerative ka qenë e disponueshme publikisht, mund të testojmë pretendimet se ajo po ndryshon ndjeshëm fuqinë punëtore – duke zhvendosur punëtorët, duke i zëvendësuar me makina, apo duke krijuar vende të reja pune,” theksuan autorët e studimit të publikuar nga The Budget Lab.
Mundesh me e lexu edhe…
Sipas tyre, “treguesit tregojnë se tregu më i gjerë i punës nuk ka përjetuar një çrregullim të dallueshëm që nga dalja e ChatGPT-së, duke zbehur frikën se automatizimi po e gërryen kërkesën për punë kognitive.” Megjithatë, studiuesit paralajmërojnë se përdorimi i gjeneratës së re të AI është ende në fazat e para dhe ndikimet afatgjata mbeten të paqarta.
Në anën tjetër, disa kompani tashmë kanë marrë vendime të rëndësishme për stafin duke u mbështetur te AI. Dropbox dhe Duolingo kanë përmendur teknologjinë si arsye për shkurtime, ndërsa një sondazh në janar tregoi se shumë punëdhënës globalisht planifikojnë të zvogëlojnë stafin për shkak të automatizimit.
Kufijtë e teknologjisë, megjithatë, po bëhen gjithnjë e më të qartë. Në shumë raste, puna e gjeneruar nga AI duhet të kontrollohet nga njerëzit, duke shtuar punë shtesë në vend që ta lehtësojë atë. Një raport i fundit nga MIT gjeti se 95% e kompanive që përdorin AI nuk po nxjerrin fitime prej saj.
Një arsye për këtë, sipas Harvard Business Review, është fenomeni i quajtur “workslop” – kur punonjësit përdorin AI për të krijuar punë me pak përpjekje që duket e pranueshme, por që në fakt gjeneron më shumë punë për kolegët e tyre. /Katror.info
Burimi: CNN
Përshtati dhe përktheu: Katror.info
