Gati 80 vite pas McCarthyizmit, aktorja legjendare Jane Fonda ka vendosur të ringjallë Komitetin për Amendamentin e Parë, organizatë e themeluar fillimisht në vitin 1947 nga figura të mëdha të Hollivudit si Henry Fonda, Lucille Ball, Humphrey Bogart, Frank Sinatra dhe Judy Garland, për të mbrojtur lirinë e fjalës dhe për të kundërshtuar censurën e kohës.
Në një letër publike të shpërndarë nga CNN, Fonda, sot 87 vjeç, bëri thirrje komunitetit të saj artistik që t’i bashkohet nismës, duke e përshkruar këtë periudhë si “momentin më të frikshëm të jetës” së saj.
“Kam parë luftë, shtypje, protesta dhe përplasje. Kam qenë e lavdëruar dhe kam qenë shpallur armike e shtetit. Por mund t’ju them se ky është momenti më i frikshëm që kam përjetuar ndonjëherë,” shkroi ajo, transmeton Katror.info.
Fonda theksoi rëndësinë e solidaritetit: “Nuk ka manual të fshehtë me të gjitha përgjigjet – por ajo që na ka shpëtuar gjithmonë është të bashkohemi, të gjejmë guximin në numra shumë të mëdhenj për t’u injoruar dhe të mbrojmë njëri-tjetrin.”
Mundesh me e lexu edhe...
Më shumë se 550 figura të njohura të Hollivudit i janë bashkuar Fondës, mes tyre Aaron Sorkin, Barbra Streisand, Glenn Close, JJ Abrams, John Legend, Julia Louis-Dreyfus, Julianne Moore, Kerry Washington, Larry David, Lily Tomlin, Natalie Portman, Pedro Pascal, Quinta Brunson, Rob Reiner, Rosie O’Donnell, Sean Penn, Spike Lee, Viola Davis, Wanda Sykes, Winona Ryder, Whoopi Goldberg dhe shumë të tjerë.
Rilindja e komitetit vjen pas debatit të madh mbi largimin e përkohshëm të Jimmy Kimmel nga ekrani këtë muaj, pas presioneve politike ndaj deklaratave të tij në monolog për rastin e Charlie Kirk. Edhe pse programi i tij u rikthye, rasti ndezi një debat të gjerë mbi lirinë e shprehjes dhe ndikimin e politikës në media.
“Rreziku është shumë i madh dhe heshtja ka një çmim tepër të lartë,” shkroi Fonda. “Ata po llogarisin në frikën dhe heshtjen tonë. Por arti dhe artistët kanë treguar gjithmonë se nuk heshtin, edhe në kohët më të errëta.”
Në deklaratën e saj, Komiteti për Amendamentin e Parë theksoi:
“Liria e fjalës dhe shprehjes është e drejtë e patjetërsueshme për çdo amerikan, pavarësisht bindjeve politike. Aftësia për të kritikuar, pyetur, protestuar dhe edhe për të tallur ata që janë në pushtet është themeli i asaj çfarë Amerika ka synuar gjithmonë të jetë.”
Burimi: CNN
Përktheu dhe përshtati: Katror.info
