Më 1 tetor ka filluar Muaji i ndërgjegjësimit për kancerin e gjirit, dhe American Cancer Society (ACS) po përkujton 40 vjet punë në përhapjeje të informacionit mbi këtë sëmundje, ka shkruar ABC News.
Kanceri i gjirit është kanceri i dytë më i zakonshëm te gratë, me një në çdo tetë gra që do ta zhvillojë gjatë jetës së saj, sipas ACS.
Megjithatë, organizata ka theksuar se zbulimi i hershëm mund të përmirësojë ndjeshëm rezultatet e trajtimit.
Mundesh me e lexu edhe…
Statistikat për kancerin e gjirit
Kanceri i gjirit është kanceri i dytë më i zakonshëm te gratë në SHBA, pas kancerit të lëkurës, dhe përbën një të tretën e të gjitha llojeve të kancereve të reja te gratë çdo vit, sipas ACS.
Midis viteve 2018 dhe 2022, më shumë se dy të tretat e rasteve të kancerit të gjirit u diagnostikuan në fazë të lokalizuar, që do të thotë se kanceri ishte i kufizuar vetëm në gji, sipas të dhënave të Centers for Disease Control and Prevention (CDC).
Kanceri i gjirit është shkaktari i dytë i vdekjeve nga kanceri te gratë, pas kancerit të mushkërive, ani pse numri i vdekjeve ka rënë gjatë tre dekadave të fundit. ACS ka deklaruar se kjo besohet të jetë për shkak të kontrolleve më të hershme, trajtimeve më të mira dhe ndërgjegjësimit në rritje.
Diagnoza e kancerit të gjirit
Shumë pacientë nuk kanë simptoma, edhe pse kanceri mund të gjendet pas shfaqjes së tyre.
Simptoma më e zakonshme është një gungë ose masë e re, por shenjat e tjera përfshijnë: ënjtje të gjirit, ngërç të lëkurës, dhimbje në gji ose thithkë, sekrecione nga thithka që nuk janë qumësht, ose lëkurë e skuqur, e thatë, e plasaritur ose e trashur mbi gji ose thithkë, sipas ACS.
Testet për zbulimin e kancerit përfshijnë mammografi, ultrzë të gjirit dhe skanim të gjirit.
ACS këshillon të diskutohen të gjitha opsionet e trajtimit me mjekun.
Trajtimi i kancerit të gjirit
Trajtimi ndryshon sipas llojit, fazës dhe vendndodhjes së kancerit, dhe mund të përfshijë kirurgji, rrezatim, kimoterapi, terapi hormonale e imunoterapi.
Kontrolli dhe testet
Aktualisht, U.S. Preventive Services Task Force rekomandon që gratë nga 40 deri në 74 vjeç me rrezik mesatar për kancer të gjirit të bëjnë mammografi çdo dy vjet.
Gratë me rrezik më të lartë, si ato me histori familjare të kancerit të gjirit, duhet të diskutojnë me mjekun për kohën e duhur të kontrollit. Kontrolli i hershëm ndihmon për zbulimin e kancerit kur është më i lehtë për t’u trajtuar./Koha.net/Katror.info
