Kombëtarja e Kosovës do të përballet nesër (e premte) me Slloveninë në stadiumin ‘Fadil Vokrri’ në kuadër të kualifikueseve për Kupën e Botës 2026.
Para këtij takimi në konferencë për media ka folur portieri Arijanet Muric, i cili tha se ekipi do të bëjë maksimumin për të marrë fitoren, shkruan telegrafi.
“Jam shumë i lumtur me paraqitjen time. Nesër pres fitore, do të bëjmë gjithçka për ta fituar ndeshjen. Nëse kthehemi në kohë, atëherë gjatë këtyre viteve jemi zhvilluar shumë”.
Mundesh me e lexu edhe...
“Kemi futbollistë në liga më të mirë, në formë më të mirë. Dallimi është dukshëm më i madh dhe shpresoj që nesër ta shfaqim këtë”.
“Gjithmonë ndihem rehat të luaj me bashkëlojtarët, me ata që kanë luajtur para neve. Paraqitja varet prej ditës, disa ditë kanë qenë në formë më të mirë dhe e kanë bërë më të lehtë punën, disa herë tjera jo”.
Sa i përket kundërshtarit, Muric tha se është një ekip që ka lojtarë të mirë por beson se Kosova ka kualitetin e duhur për t’i mposhtur ata.
“Secila kombëtare ka lojtarë të shkëlqyer dhe nuk mendoj se nuk kanë ndonjë gjë të veçantë. Po, kemi pasur përkrahje të madhe dhe kjo na bën të japim diçka më shumë, jemi falënderues për tifozët që na ndihmojnë”.
Muric gjithashtu pati edhe disa fjalë për kolegun e tij Jan Oblak, të cilin e vlerësoi mjaft shumë:
“Ai (Oblak) ka qenë një nga portierët më të mirë në botë, po shpresoj që nesër t’i shënojmë disa gola dhe ta fitojmë ndeshjen, kjo për mua ka rëndësi”, përfundoi Muric.
Kujtojmë se ndeshja mes Kosovës dhe Sllovenisë është paraparë të nis me fillim nga ora 20:45. /Katror.info
