Ekspozita interaktive ‘Glass Room – Misinformation Edition’ në Europe House sjell një përvojë unike që zbulon se çfarë ndodh me të dhënat tona dhe si dizajni digjital ndikon në sjelljen njerëzore.
Sot në Europe House Kosovo në Prishtinë u hap ekspozita interaktive “Glass Room – Misinformation Edition”, e cila do të qëndrojë e hapur për publikun deri më 31 tetor 2025.
E zhvilluar nga Tactical Tech, organizatë joqeveritare në Berlin dhe e mbështetur nga Bashkimi Evropian në Kosovë, kjo ekspozitë sjell një përvojë unike për të kuptuar mënyrën se si teknologjia, rrjetet sociale dhe dizajni ndikojnë në perceptimet dhe besimet tona online, shkruan Katror.info.
Mundesh me e lexu edhe…
Përmes instalacioneve vizuale dhe materialeve ndërvepruese, ekspozita i fton vizitorët të eksplorojnë se çfarë ndodh me të dhënat e tyre personale, si përhapen lajmet e rreme dhe cilat janë truket e dizajnit që nxisin emocionet dhe sjelljen digjitale.
Në hapje të ekspozitës,ambasadori Aivo Orav, Shef i Zyrës së Bashkimit Evropian në Kosovë, theksoi sfidat me të cilat përballet Evropa dhe bota në mbrojtjen e shoqërive nga dezinformimi, duke theksuar rëndësinë e vetëdijes digjitale dhe të menduarit kritik.
“Në të gjithë Evropën dhe mbarë botën, përballemi me një sfidë të përbashkët – si t’i mbrojmë shoqëritë tona nga dezinformimi, keqinformimi dhe manipulimi me informacionin. Kjo nuk është vetëm një çështje që lidhet me median apo botën online, por me qëndrueshmërinë, besimin dhe demokracinë – vlera që na bashkojnë dhe na përcaktojnë si evropianë. Në botën e sotme digjitale, informacioni përhapet më shpejt se kurrë më parë. Ne jemi krenarë që bashkëpunojmë me partnerët tanë në Kosovë që ndajnë të njëjtën vizion – gazetarë, edukatorë, shoqëri civile dhe të rinj. Së bashku, po ndihmojmë qytetarët të zhvillojnë aftësitë e nevojshme për të njohur dezinformimin, për të vënë në pikëpyetje narrativat dhe për të marrë vendime të informuara,” tha Orav.
Bashkimi Evropian beson se përgjigjja më e mirë ndaj dezinformimit nuk është frika nga censura, por dija, hapja dhe të menduarit kritik. Kjo ekspozitë është shembull i mënyrës se si të mësuarit mund të jetë krijues dhe ndërveprues, duke i inkurajuar të gjithë të mendojnë në mënyrë kritike për informacionin online që konsumojnë,” ai shtoi tutje.
Pas tij, fjalë mori gazetari dhe hulumtuesi Kreshnik Gashi, i cili foli për ndikimin e dezinformatave në shoqërinë kosovare dhe theksoi se ekspozita ndihmon qytetarët të fitojnë njohuritë themelore për trajtimin e përmbajtjeve online dhe zhvillimin e aktivizmit qytetar.
“Në këtë ekspozitë për shumë pak minuta, secili qytetar i Kosovës mundet me u pajis me njohuritë elementare se si duhet me e trajtu qasjen në internet, në marrjen e të dhënave të internet dhe cili duhet me qenë aktivizmi qytetar për me e luftu një të keqe të madhe me të cilën është duke u përballë bota, pra dezinformata dhe çrregullimi i informacionit. Të dhënat faktike që i kemi për shoqërinë tonë, na ngrisin në një nivel të alarmit dhe kërkojnë një hyrje gjithëshoqërore për me mbërri me i rrit kapacitetet e shoqërisë në trajtimin e çrregullimit të informacionit. Prej të dhënave të hulumtimit, po na del se qytetarët tanë çdo ditë e ma shumë po marrin ilaçe, po marrin trajtime shëndetësore duke u bazu në dezinformatë,” u shpreh Gashi.
“Programi synon me i eduku të rinjtë dhe të rejat e Kosovës qysh me iu qas dezinformatës, mirëpo programe të tilla duhen me u ndjekë prej secilit prej nesh. Andaj, jam shumë i entuziazmuar që kam me qenë pjesë e këtij projekti dhe që kam me mbërri me nda një eksperiencë bukur të madhe në raport me ndërtimin e mekanizmave mbrojtës për ruajtjen e privatësisë,” shtoi ai.
Ekspozitën e ndoqën vizitorë të shumtë, të cilët shprehën interes të madh për përmbajtjen e saj, duke eksploruar me kujdes instalacionet interaktive dhe duke u informuar mbi mënyrat se si të dhënat personale, informacioni online dhe dezinformimi ndikojnë në jetën e përditshme.
Në kuadër të ekspozitës do të mbahet edhe punëtoria “Zbërthimi i të Dhënave Tuaja: Faktet kundër Ndjenjave: Qëndro i Qetë dhe Zbulo Truket e Dizajnit”, më 29 tetor nga ora 13:00 deri në 15:00, e cila do t’u ofrojë të rinjve njohuri praktike mbi mbrojtjen e të dhënave, vetëdijesimin dhe aftësitë për t’u orientuar në mënyrë të sigurt në botën digjitale.
Ekspozita “Glass Room – Misinformation Edition” do të qëndrojë e hapur deri më 31 tetor, duke i ftuar qytetarët e Prishtinës dhe jo vetëm ta vizitojnë, të mësojnë dhe të reflektojnë mbi mënyrën se si informacioni online ndikon në jetën e tyre të përditshme./Katror.info.
