Rruga drejt lavdisë olimpike në xhudo nis shumë përpara vetë Lojërave Olimpike — dhe për shumë prej kampionëve të mëdhenj të këtij sporti, ajo kalon përmes Kampionatit Evropian të Xhudos për të Rinj nën 23 vjeç (U23). Ky turne është shndërruar në një nga arenat më të rëndësishme për formimin e kampionëve të së ardhmes, një hap vendimtar midis talentit të hershëm dhe përsosmërisë së vërtetë në nivelin elitar.
Me moshën mesatare të kampionëve olimpikë që sillet rreth 25 vjeç për meshkuj dhe pak mbi 26 për femra, grupmosha U23 përfaqëson urën e përsosur midis premtimit të kategorive të juniorëve dhe arritjeve të mëdha në arenën botërore. Me kalimin e viteve, është dëshmuar se suksesi në këtë nivel shpesh paralajmëron fitore të mëdha në skenën olimpike.
Në këtë rrugëtim spikat gjenerata e artë e Kosovës, që e ka kthyer xhudon në simbol të krenarisë kombëtare. Majlinda Kelmendi, Distria Krasniqi dhe Nora Gjakova janë tri emrat që nisin historinë e tyre të lavdishme pikërisht në Kampionatin Evropian U23, përpara se të ngjiten në majat e sportit botëror me medalje olimpike.
Mundesh me e lexu edhe…
Majlinda Kelmendi e hapi rrugën me medaljen e artë historike në Lojërat Olimpike “Rio 2016”, duke e bërë Kosovën vendin më të ri në botë me një kampione olimpike. Frymëzuar nga suksesi i saj, Krasniqi dhe Gjakova e vazhduan trashëgiminë në “Tokio 2020”, duke sjellë dy medalje të arta që shënuan kulmin e epokës së artë të xhudos kosovare. Këto triumfe nuk ishin vetëm fitore sportive, por edhe dëshmi e një kulture disipline, përkushtimi dhe qëndrueshmërie që përfaqëson frymën e Kosovës.
Në anën tjetër, Kampionati Evropian U23 vazhdon të jetë një vatër e talenteve që më vonë shkëlqejnë në skenën botërore. Që nga themelimi, ky kampionat ka kurorëzuar fitues nga 39 shtete evropiane, ndërsa Rusia, Hungaria dhe Gjermania qëndrojnë në krye të tabelës historike të medaljeve. Hungaria, në veçanti, ka luajtur rol të rëndësishëm — duke organizuar garën dy herë (2018 dhe 2021) dhe duke nxjerrë kampionë të shumtë, përfshirë Abigel Joo, sportisten më të dekoruar në historinë e turneut me katër tituj e një bronz.
Mosha mesatare e kampionëve të U23 sillet rreth 21 vjeç, por garat kanë parë edhe përjashtime të jashtëzakonshme si Joanne van Lieshout (17) dhe Tara Babulfath (18), të cilat kanë thyer kufijtë e moshës duke fituar tituj në faza të hershme të karrierës.
Shumë prej emrave të mëdhenj të xhudos kanë kaluar pikërisht nëpër këtë garë përpara se të shkëlqenin në Lojërat Olimpike: Ilias Iliadis, Lukas Krpalek, Mansur Isaev, Fabio Basile, e më së fundi Hidayat Heydarov, të gjithë kampionë evropianë U23 që më vonë fituan edhe medalje ari olimpike.
Për Kosovën, ky rrugëtim është bërë histori suksesi. Nga titujt e rinisë në arenën evropiane, deri te nderimi në Olimpiadë, xhudistët kosovarë kanë treguar se pasioni dhe përkushtimi mund ta ngritin një vend të vogël në majat e botës.
Kampionati Evropian i Xhudos për të Rinj nën 23 vjeç nuk është vetëm një garë për të rinj — është trampolina e kampionëve të së ardhmes, momenti kur talenti, pjekuria dhe ambicia bashkohen për të formuar madhështinë. Në çdo edicion, aty përjetësohen vlerat themelore të xhudos — seiryoku zen’yō (efikasitet maksimal) dhe jita kyōei (mirëqenie e ndërsjellë) — që frymëzojnë breza të rinj xhudistësh, nga Prishtina deri në çdo cep të Evropës.
Marrë nga European Judo Union, pershtatur nga Katror.info.
