Në një cep të vogël të Paqësorit Jugor, ndodhet një nga atraksionet më të pazakonta të botës: Zyra e vetme postare nën ujë, në ishullin Hideaway të Republikës së Vanuatusë.
E vendosur rreth tre metra nën sipërfaqen e ujit, brenda rezervatit detar të ishullit Hideaway, kjo zyrë postare e veçantë u hap në maj të vitit 2003, pas miratimit nga komuniteti lokal Ni-Vanuatu, dhe që atëherë është shndërruar në një simbol të turizmit ekologjik dhe të shpirtit inovativ të vendit.
Ndonëse duket si një atraksion për turistë, zyra nënujore funksionon njësoj si çdo zyrë tjetër postare – vetëm se këtu, dërgimi i kartolinave kërkon maskë, tuba frymëmarrjeje dhe pak guxim për të zhytyr.
Mundesh me e lexu edhe...
Vizitorët mund të blejnë kartolina të veçanta të papërshkueshme nga uji, të cilat anulohen me një vulë të posaçme të stampuar, në vend të bojës tradicionale postare.
Gjatë orarit zyrtar, punonjësit e postës zhyten në ujë, ndërsa një flamur i veçantë mbi ujë tregon se zyra është “hapur”. Për ata që nuk mund të zhytën deri në thellësinë tre metra, stafi i ishullit është gjithmonë në gatishmëri për të ndihmuar.
Pas orarit, kartolinat mund të vendosen në kutinë nënujore të postës, e cila garanton që çdo dërgesë do të marrë vulën unike të “Underwater Post Office”, përpara se të shpërndahet si çdo letër tjetër – brenda dhe jashtë vendit.
Ky inovacion nuk është rastësor. Me 83 ishuj dhe një ekosistem detar të pasur, Vanuatu është një parajsë për zhytësit.
Falë ligjeve të forta të Parkut Detar Kombëtar, koralet dhe jeta detare mbeten të mbrojtura dhe të shëndetshme, duke e bërë Vanuatun një destinacion të preferuar për turizmin ekologjik.
Në temperatura të ujit që mund të arrijnë deri në 30°C, edhe fëmijët e vegjël mund të përjetojnë emocionin e notit mes kopshtesh koralesh shumëngjyrëshe dhe peshqve tropikalë. /AP/Katror.info
