Kompania Meta po përgatit një ndryshim të madh në mënyrën se si funksionon WhatsApp. Së shpejti, përdoruesit mund të kenë mundësinë të dërgojnë dhe të marrin mesazhe edhe nga persona që nuk përdorin vetë aplikacionin, raporton portali Android Central.
Funksioni i ri, i quajtur “Third-party chats”, aktualisht është në fazën e testimit në versionin beta (Android 2.25.33.8) dhe pritet të mundësojë shkëmbimin e mesazheve tekst, fotografive, videove, mesazheve zanore dhe dokumenteve midis WhatsApp dhe aplikacioneve të tjera të komunikimit.
Përdoruesit do të mund të zgjedhin nëse këto biseda do të shfaqen në listën kryesore të chat-eve apo në një seksion të veçantë të quajtur “Third-party chats”. Deri më tani, në testim është përfshirë vetëm aplikacioni “BirdyChat”.
Mundesh me e lexu edhe...
Megjithatë, disa veçori si stikerat, statuset dhe mesazhet që zhduken nuk do të jenë të disponueshme gjatë komunikimit ndër-aplikacion. Po ashtu, bllokimi i një kontakti në WhatsApp nuk nënkupton domosdoshmërisht se ai person nuk mund të kontaktojë përmes një aplikacioni tjetër — kjo varet nga rregullat e vetë platformës tjetër.
Ky zhvillim lidhet drejtpërdrejt me rregulloren e Digital Markets Act (DMA) të Bashkimit Evropian, e cila detyron kompanitë e mëdha teknologjike të lejojnë ndërveprimin (interoperabilitetin) mes shërbimeve të tyre dhe aplikacioneve konkurrente.
Meta ka deklaruar se po punon për të zbatuar këtë sistem duke ruajtur standardet e larta të privatësisë dhe enkriptimit, për të cilat njihet WhatsApp-i. Megjithatë, kompania nuk ka bërë ende të ditur datën e saktë të lançimit për publikun e gjerë. /Katror.info
