Gjakova është bërë mikpritëse e një ngjarjeje të rëndësishme sportive ndërkombëtare – turneut të FIBA Youth Development Fund (YDF) për grupmoshën U14, në të dyja konkurrencat, vajza dhe djem. Kjo është hera e parë që një turne i tillë zhvillohet në qytetin e Gjakovës, me pjesëmarrjen e pesë shteteve: Kosovës, Turqisë, Maqedonisë së Veriut, Rumanisë dhe Bullgarisë.
Turneu do të mbahet nga 11 deri më 16 nëntor, ndërsa ndeshjet zyrtare nisin më 12 nëntor dhe do të zgjasin deri më 16 nëntor, me katër takime në ditë. Më 11 nëntor ekipet do të zhvillojnë stërvitjet përgatitore.
Ky turne është pjesë e bashkëpunimit të gjatë ndërmjet Federatës së Basketbollit të Kosovës (FBK) dhe FIBA YDF-së, që daton nga viti 2016. Përmes këtij programi janë identifikuar dhe zhvilluar shumë talente të rinj të basketbollit, janë trajnuar dhjetëra trajnerë dhe është ngritur niveli profesional i lojtarëve të rinj.
Mundesh me e lexu edhe...
Në kuadër të turneut do të zhvillohen gjithsej 20 ndeshje, me orar të detajuar që nis çdo ditë nga ora 14:00 deri në orën 20:00.
Ky aktivitet pritet të sjellë një atmosferë të veçantë sportive në Gjakovë, duke e bërë qytetin nikoqir të një ngjarjeje të rëndësishme të zhvillimit të basketbollit evropian për grupmoshat e reja./Katror.info
