Netflix ka zbuluar më në fund vazhdimin e shumëpritur të serialit Man Vs Bee, dhe këtë herë Trevor Bingley nuk do të përballet më me një bletë, por me… një foshnjë! Platforma ka konfirmuar se “Man Vs Baby” do të debutojë më 11 dhjetor 2025, me të katër episodet prej 30 minutash secili të publikuar menjëherë, shkruan What’s on Netflix, transmeton Katror.info.
Seriali i ri vjen më shumë se tre vite pas premierës së Man Vs Bee në qershor 2022. Rowan Atkinson, aktori legjendar i roleve si Mr. Bean, Johnny English dhe Blackadder, rikthehet si Trevor Bingley, tashmë i përgatitur për një aventurë krejtësisht të re dhe po aq kaotike.
Nga një bletë te një foshnjë – rrëmuja vazhdon
Projekti u njoftua zyrtarisht në dhjetor 2024, me xhirimet që u zhvilluan në Mbretërinë e Bashkuar, përfshirë edhe lokacione ikonike të Londrës si Piccadilly Circus.
Mundesh me e lexu edhe...
Sipas sinopsisit zyrtar, pas dështimit të tij të bujshëm si ‘housesitter’ në serinë e parë, Trevor ka zgjedhur një punë më të qetë si kujdestar shkolle. Por qetësia nuk zgjat shumë. Një ofertë joshëse për të kujdesur një penthouse luksoz në Londër gjatë Krishtlindjes e tund përsëri në telashe. Situata ndërlikohet akoma më shumë kur në ditën e fundit të semestrit, askush nuk paraqitet për të marrë foshnjën që luan Baby Jesus në shfaqjen e Krishtlindjes—dhe Trevor mbetet me një “bashkëudhëtar” krejtësisht të papritur.
Me një foshnjë që duhet ushqyer dhe një penthouse që duhet mbrojtur, a do t’ia dalë Trevor të kalojë një Krishtlindje të qetë, apo festat do të shndërrohen në kaos?
Seriali me katër pjesë vjen nga krijuesit Rowan Atkinson dhe Will Davies. Chris Clark dhe Davies janë producentët ekzekutivë, ndërsa Kate Fasulo shërben si producente e serialit dhe David Kerr merr regjinë. Projekti realizohet nga HouseSitter Productions.
Në pritje të premierës, një gjë është e sigurt: Trevor Bingley nuk zhgënjen kurrë kur bëhet fjalë për telashe—dhe këtë herë, ato do të jenë më të ëmbla se kurrë… por edhe më të ndërlikuara! /Katror.info
