“Një ditë e zakonshme është që duhna 24/7 me e ditë sa e kam sheqerin. Nëse nuk e di sa e kam sheqerin nuk muj me funksionu…” – Lisa Mehmeti.
Lisa Mehmeti, studentja 21-vjeçare, jeton me diabet që nga mosha 6-vjeçare.
“Faktikisht unë shumë pak e mbaj mend veten pa diabet, mirëpo e di që në fillim është kanë pak shok dhe kam mendu që kur dal prej spitalit ka me më kalu. Kur kam dalë prej spitalit e kam kuptu që është sëmundje kronike dhe që kam me jetu me qet gjendje shëndetësore. Po me përkrahjen e familjes tem e kam kuptu që gjithçka është e kalueshme, nëse e sheh në një mënyrë pozitive. Prandaj edhe e kam formu organizatën Tip1 Omël që me e ngritë zërin dhe me u bashku si komunitet” – tha ajo.
Mundesh me e lexu edhe...
Historia e saj me diabetin tip 1 ka ndikuar drejtpërdrejt në vizionin e organizatës së themeluar nga vetë ajo, Tip1 Omël, që fokusohet në rritjen e vetëdijesimit dhe avokimin për kushte më të mira në vend.
Më 14 nëntor, në Ditën Botërore të Diabetit, organizata “Tip1 Omël” organizoi një event sensibilizues që mblodhi së bashku komunitetin e personave me diabet tip 1, institucionet dhe mbështetësit e kauzës.
“Hapat e parë të organizatës kanë qenë goxha të vështirë, po qysh thashë edhe për gjendjen tem shëndetësore, nëse e ki përkrahjen e mirë edhe organizata ka vazhdu me qenë shumë mirë, në hapa të mirë. Prandaj, edhe tash që e kemi përkrahjen e Komunës së Prishtinës që po na e mundësojnë me një zyrë në Pallatin e Rinisë, është një hap shumë i madh për neve, ku mundemi me pasë një hapësirë ku mbledhemi kështu, jo veç për Ditën Botërore të Diabetit” – u shpreh ajo.
Në event u prezantua një instalacion simbolik i përbërë nga lapsat–gjilpëra të përdorura nga personat me diabet tip 1, i konceptuar për të reflektuar barrën e vazhdueshme fizike dhe emocionale që shoqëron menaxhimin e kësaj gjendjeje kronike.
“Një ditë e zakonshme është që duhna 24/7 me e ditë sa e kam sheqerin. Nëse nuk e di sa e kam sheqerin nuk muj me funksionu, domethënë edhe para se me e pas qet event jam dashtë me e ditë sa e kam sheqerin, për me mujt me dalë në skenë me folë. Unë jam shumë e mësume me gjendjen time shëndetësore. E kam lifestyle. Domethënë as nuk e njoh veten pa diabet, mirëpo unë edhe njerëzit që diagnostikohen qitash në moshën tem, du me ju tregu edhe me i motivu që qaq bëhet pjesë e jetës, saqë as nuk… Normal që e vëren, po ia merr dorën shumë” – rrëfeu Lisa.
Qëllimi kryesor i ngjarjes ishte rrjetëzimi dhe krijimi i një komuniteti ku personat me diabet tip 1 të mund të gjejnë informacion, mbështetje dhe orientim drejt një jete më të lehtë e më të shëndetshme.
“Jam shumë e lumtur për prindërit e mi që i kam, që kanë hi dhe e kanë studiu shumë gjendjen tem shëndetësore, prandaj edhe jam edhe tash kaq e informume, se atëherë ka qenë shumë vështirë me i gjetë informatat”. Ka pasë tepër shumë njerëz me diabet në këtë event që ma kanë mbushë plot zemrën, që unë kur kam qenë e vogël ta kisha pasë mundësinë me u taku me kaq shumë njerëz ish kanë një ëndërr për mu. Kështu që nuk po e boj veç për qata njerëz, por po e boj edhe për veten kur kam qenë fëmijë” – tha ajo.
Organizata Action for Mothers and Children gjithashtu ka mbështetur pacientët me diabet tip 1, duke siguruar materialet esenciale për 10 fëmijë të Klinikës Pediatrike të QKUK-së për vitin 2025–2026. Donacioni prej 15,000€ garanton trajtim të vazhdueshëm dhe shërben si bazë për përfshirjen e këtyre pajisjeve në Listën Esenciale të Barnave dhe Pajisjeve Mjekësore, kërkesë e cila u bë e njohur edhe gjatë eventit.
“Në fillim të vitit ne e kemi përmbushë zotimin tonë për dhurimin e dhjetë pompave të para në Kosovë, të pompave të insulinës, ndërsa tash me ndihmën e komunitetit shqiptar në Zvicër kemi ble pajisjet esenciale për përdorim të pompave edhe për një vit tjetër. Bashkëpunimi me Lisën është i mrekullueshëm. Lisa është një avokuese, është një lidere e re, e cila po udhëheq një komunitet për të përfitu të drejtat që ju takojnë” – tha Rina Demiri, drejtore ekzekutive në AMC.
Por ajo thotë se kjo nuk e zgjidh problemin e fëmijëve me diabet.
“Është një ndihmë, është një iniciativë shumë e mirë, por është edhe një zile për organet tona, për Ministrinë e Shëndetësisë, për Agjencionin për Produktet dhe Pajisje Medicinale Esenciale që këto produkte të përfshihen në listën e pajisjeve esenciale mjekësore. Ne sot kemi drejtu edhe një letër avokuese, në të cilën kemi paraqitë kërkesat tona dhe arsyet pse pompat e insulinës dhe sensorët për matje të glukozës duhet të përfshihen në listën e pajisjeve esenciale mjekësore” – shtoi tutje ajo.
Drejtori i Shëndetësisë në Komunën e Prishtinës, Izet Sadiku, vlerësoi angazhimin e organizatës dhe siguroi vazhdimësinë e mbështetjes institucionale.
“Para një viti na e kemi fillu aktivitetin, është ardhë Lisa dhe ka tregu që ka formu një shoqatë të personave që jetojnë me diabet tip një dhe kemi bo takimin e parë para një viti me bashkëpunu si Drejtori e Shëndetësisë në Prishtinë, kemi bërë aktivitete të përbashkëta. Besoj që do të vazhdojmë edhe me aktivitete tjera dhe me gjetë mundësi që me përkrah, për arsye që ka shumë rëndësi përkrahja e kësaj kategorie duke pasë parasysh se zakonisht shumica e këtyre të sëmurë janë pacientë të moshës fëminore dhe kanë nevojë gjatë gjithë jetës pastaj për përkrahje, për insulinë” – u shpreh z.Sadiku.
Ngjarja u përmbyll me shfaqjen e një filmi të shkurtër mbi diabetin, që transmetoi një mesazh të fuqishëm për komunitetin dhe institucionet./Katror.info.
Edicionin #91 të plotë e gjeni KËTU😊
