Prej këtij muaji, të gjitha parkingjet në Kore të Jugut me më shumë se 80 vende do të jenë të detyruara të instalojnë panele diellore mbi hapësirat e parkimit. Dhe ndryshe nga propozimet e ngjashme në SHBA, ky ligj nuk vlen vetëm për ndërtimet e reja — edhe parkingjet ekzistuese duhet të përshtaten, shkruan OGN Daily, transmeton Katror.info.
Përveç krijimit të vendeve të reja të punës dhe forcimit të rrjetit energjetik me burime të rinovueshme, këto struktura diellore pritet të sjellin përfitime të prekshme për drejtuesit koreanë të automjeteve. Mbulesat do të mbrojnë makinat nga shiu i dendur, bora dhe nxehtësia e fortë verore — duke i mbajtur më të freskëta, duke zgjatur jetën e pjesëve të brendshme dhe duke ndihmuar edhe mjetet elektrike të ruajnë më shumë bateri falë nevojës më të vogël për klimatizim. Në shumë raste, ato do të ofrojnë edhe mundësi karikimi gjatë parkimit.
Zyrtarët e Ministrisë e shohin nismën si një hap të rëndësishëm. “Me këtë instalim të detyrueshëm, presim të zgjerojmë përdorimin e energjisë së ripërtëritshme, duke sjellë njëkohësisht përfitime të drejtpërdrejta për qytetarët,” tha për Asia Business Daily një zyrtar që preferoi të mbetet anonim. “Duke shfrytëzuar hapësira të papërdorura si parkingjet, rrisim efikasitetin e tokës. Për më tepër, panelet e tipit ‘canopy’ ofrojnë hije, duke sjellë rehati të ndjeshme për përdoruesit gjatë motit të nxehtë.”
Mundesh me e lexu edhe...
Një hap i ri drejt një infrastrukture më të gjelbër dhe më funksionale — dhe një shembull që mund të shërbejë si model edhe për vende të tjera. /Katror.info
Burimi: Only Good News Daily
Përktheu dhe përshtati: Katror.info
