Pas përfundimit të zgjedhjeve lokale, të cilat kanë qenë gjithëpërfshirëse në të gjitha komunat, përfshirë edhe ato në veri, deputeti i Parlamentit Evropian, Thijs Reuten, ka thënë se Bashkimi Evropian nuk ka më asnjë arsye që ta mbajë Kosovën nën masa sanksionuese. Sipas tij, veprime duhet të ndërmerren edhe në shqyrtimi e aplikacionit të Kosovës për anëtarësim në BE, që është dorëzuar më 2022, pavarësisht pengesave që mund të shfaqin shtetet jonjohëse.
Në një bisedë për KOHËN, në margjinat e Konferencës së Sigurisë të mbajtur në Beograd, eurodeputeti Reuten ka thënë se ky proces ka ngecur në BE pa arsye teksa e ka shtruar nevojën për veprime konkrete nga të gjitha palët e përfshira.
“Siç ndoshta e dinë shikuesit tuaj, unë jam një mbështetës i fortë i rrugës së Kosovës drejt Bashkimit Evropian dhe mendoj, dhe e kam thënë këtë shumë herë, se tani duhet të fokusohemi në përfundimin e punës. Një nga hapat e rëndësishëm është që aplikimi i Kosovës për anëtarësim të shqyrtohet më në fund. Nuk mund ta kuptoj që kjo të qëndrojë kaq gjatë në pritje”, është shprehur Reuten.
Mundesh me e lexu edhe...
Eurodeputeti holandez ka thënë se arsye për mosshqyrtimin e aplikacionit nuk duhet të shërbejë fakti se pesë shtete anëtare të BE-së ende nuk e kanë njohur pavarësinë e Kosovës.
“Nuk ka absolutisht asnjë arsye për këtë. Ne mund të vazhdojmë me procesin, pavarësisht faktit që ende ka disa shtete anëtare të BE-së që nuk e njohin Kosovën. Kjo është një fakt, por megjithatë mund të vazhdojmë me përpunimin e aplikimit për anëtarësim”, ka thënë ai.
Për sa i përket dialogut midis Kosovës dhe Serbisë, të cilin e lehtëson Bashkimi Evropian, ai ka folur për rëndësinë e krijimit të një momentumi të ri për të avancuar marrëveshjet dhe që kjo të nisë me heqjen e masave për Kosovën./Katror.info
Përgatiti:
