Kryesuesi i Kuvendit Komunal të Prishtinës, Fehmi Kupina, ka thirrur seancë të jashtëzakonshme për bartjen e mjeteve vetanake të kryeqytetit dhe për buxhetin e vitit 2026.
Seanca do të mbahet të enjten, më 27 nëntor.
Vendimi vjen pasi që të hënën transporti publik i kryeqytetit u pezullua. Transportuesit privatë kanë protestuar para Komunës së Prishtinës, pasi që kanë marrë vendim që të pezullojnë të gjitha linjat në Prishtinë, për shkak të mospagesës nga Komuna e Prishtinës.
Mundesh me e lexu edhe...
Qeveria në detyrë dhe zyrtarët komunalë vazhdojnë të mos i kursejnë që disa muaj akuzat ndaj njëri-tjetrit për situatën e komplikuar me financat në komunë.
Kryetari i Prishtinës, Përparim Rama ka marrë pjesë në protestën para objektit të Qeverisë së Kosovës më 24 nëntor, bashkë me operatorët privatë të transportit publik, duke e akuzuar ekzekutivin për “fonde të mangëta”, të cilat, sipas tij nuk kanë mjaftuar për t’i obligimet ndaj operatorëve.
Më vonë përfaqësuesi i shoqatës së transportuesve privatë, Avdyl Brajshori, ka thënë se në takimin me ministrin në detyrë të Financave, Hekuran Murati, u është thënë se duhet mbledhur Kuvendi Komunal i Prishtinës e ta kalojë bartjen e mjeteve.
Brajshori ka thënë se po shkojnë sërish ta takojnë kryetarin e Prishtinës, Përparim Rama.
Në anën tjetër, ministri në detyrë i Financave, Hekuran Murati, ka bërë të ditur një ditë më parë se Zyra e Thesarit të Shtetit qysh të premten e ka alokuar buxhetin e dhjetorit për Komunën e Prishtinës, për t’i paguar disa shërbime esenciale, siç është energjia elektrike.
“Mirëpo në fund të ditës, nga Thesari më njoftuan që përkundër alokimit, stafi i Komunës së Prishtinës kishin përfunduar orarin dhe nuk e kishin kryer asnjë pagesë, me arsyetimin se ‘i kryejmë të hënën’”, ka bërë të ditur Murati përmes një postimi në Facebook.
Kuvendi i Kosovës e pati edhe një mundësi të fundit për t’i votuar katër projektligje të rëndësishme për vendin javën e kaluar, para se ky institucion të shpërbëhej dhe të caktohej data për zgjedhje të reja.
Në mesin e katër projektligjeve, ishte edhe ai për miratimin e buxhetit për tri komuna të Kosovës: Prishtinën, Gjilanin dhe Zubin Potokun. Pavarësisht thirrjeve të Lëvizjes Vetëvendosje, parti që tani udhëheq me Qeverinë në detyrë, partitë tjera nuk patën gatishmëri për t’i miratuar këto dokumente./Katror.info
