Në kryeqytet ka nisur punimet Samiti i Paqes dhe Demokracisë në Kosovë (KPDS), me temën “Çrregullim i ri botëror: dezinformim, mosbesim dhe çmontim i normave demokratike”, raporton Ekonomia Online.
Përfaqësues të shoqërisë civile, diplomatë, studiues dhe drejtues organizatash ndërkombëtare janë mbledhur për të diskutuar sfidat globale që ndikojnë drejtpërdrejt në gjendjen demokratike të vendit dhe rajonit.
Drejtoresha Ekzekutive e New Social Initiative, Jovana Radosavljeviq, theksoi se vështirësitë financiare me të cilat po përballet shoqëria civile lidhen me lodhjen e publikut dhe mungesën e një perspektive të qartë për përfundimin e betejave që ajo i konsideron të drejta. Ajo e përshkroi shoqërinë civile si “një xixëllonjë të vetme” që mban gjallë dialogun në realitetin politik që, sipas saj, po errësohet dita-ditës.
Mundesh me e lexu edhe...
Ndërsa, Drejtori Ekzekutiv i Qendrës Kosovare për Studime të Sigurisë, Mentor Vrajolli, u shpreh se shpreson që samiti të nxisë më shumë bashkëpunim, si mes organizatave të shoqërisë civile ashtu edhe në ruajtjen e dialogut mbi çështjet kyçe të demokracisë dhe sigurisë.
Drejtori Ekzekutiv i Sbunker, Bardhi Bakija, vuri në pah se edicioni i sivjetshëm po zhvillohet në një kohë të karakterizuar nga “inxhinieria e narrativave”, e cila po formëson realitetet politike dhe duke dëmtuar thellë normat demokratike. Ai paralajmëroi se Ballkani Perëndimor po rrëshqet drejt miteve etnike dhe nacionalizmit performativ, duke u bërë terren i favorshëm për luftën informative të aktorëve globalë.
Ambasadori i BE-së në Kosovë, Aivo Orav, tha se shoqëritë në Kosovë dhe rajon po përballen me sfida të paprecedentë, veçanërisht me dezinformimin dhe polarizimin, të cilat po minojnë besimin publik. Ai rikujtoi se Kosova renditet e 40-ta nga 41 vende në Indeksin Evropian të Edukimit Mediatik, duke theksuar mungesën e investimeve dhe të një strategjie kombëtare për edukimin medial. Sipas tij, shoqëria civile mbetet “vija e parë” në këtë përpjekje.
Presidenti dhe CEO i Fondit Rockefeller Brothers, Stephen B. Heintz, vlerësoi se titulli i samitit është “jashtëzakonisht i qëlluar”, pasi bota po kalon një periudhë të rrezikshme ku demokracitë po përballen me rënie, kufizim të hapësirës qytetare dhe rritje të praktikave autokratike. Ai theksoi se Ballkani përballet me pasojat e tensioneve të vjetra dhe me ndikimin e dezinformimit, duke shtuar se demokracia nuk e mbron veten dhe kërkon angazhim të vazhdueshëm qytetar dhe institucional.
Në kuadër të samitit u mbajt edhe një bisedë një-më-një mbi sfidat e dialogut Kosovë–Serbi në kushtet e luftës së narrativave. Po ashtu, gjatë ditës dhe nesër pritet të zhvillohen disa panele tematike, përfshirë:
- Etno-politika e ringarkuar: radikalizimi, siguria dhe e ardhmja rajonale
- Si i formësojnë narrativat e keqdashje Ballkanin Perëndimor
- Roli i OJQ-ve në arkitekturën e ndërtimit të paqes në OKB
- E ardhmja e integrimit evropian: kush do ta kapë trenin e BE-së 2030?
Samiti synon të ofrojë një platformë për debat konstruktiv dhe për identifikimin e mekanizmave të përbashkët që mund të forcojnë demokracinë, transparencën dhe rezistencën ndaj dezinformimit në Kosovë dhe rajon./Katror.info
