Të mërkurën ka nisur edicioni i 76-të i Panairit të Librit në Frankfurt të Gjermanisë, me moton “FBM24 is Read!ng”.
Në këtë panair janë mbi 7.500 ekspozues me mbi 285.000 profesionistë të fushës nga e gjithë bota.
Shteti i Kosovës po prezantohet përmes Shoqatës së Botuesve të Kosovës (SHBK) dhe me ndihmën e Ministrisë së Kulturës, Rinisë dhe Sportit.
Mundesh me e lexu edhe...
Botuesit nga Kosova janë vendosur në sallën 4.1, në stendën F96 të këtij panairi, sallë e botuesve dhe shteteve ndërkombëtare si Ukraina, shtetet skandinave, bota arabe, shtetet baltike, Belgjika, shtetet e Evropës Qendrore, Holanda, etj.
SHBK ka bërë të ditur se në këtë panair po prezantohen botimet më të reja të botuesve kryesorë të Kosovës, si “Buzuku”, “Koha”, “Faik Konica”, “Pema”, “Artini”, “Skanderbeg Books”, “Albas”, “Meshari”, “Magjia e Librit”, “Noa”, e të tjerë, si dhe institucioneve si Akademia e Shkencave dhe e Arteve e Kosovës, Instituti Albanologjik, Instituti i Historisë dhe Universiteti i Prishtinës.
E ftuar nderi këtij edicioni është Italia.
“Italia, si e ftuar nderi, paraqet dhe prezanton traditën e saj të gjallë letrare. Në ditët e para, panairi ka karakter profesional dhe vizitohet nga institucionet e librit mbarëbotërore për të komunikuar mbi industrinë e librit, ndryshimet dhe rëndësinë e ruajtjes së traditës thelbësore të dijes”, ka njoftuar SHBK.
Tutje theksua se në fund të javës, panairi hapet edhe për qytetarë dhe vizitorë, me ç’rast mbahen promovime me autorë dhe orë letrare në stendën e Kosovës, që është edhe pikëtakim i qindra kosovarëve që jetojnë në Gjermani./Katror.info
Përgatiti:
