Një studim i ri tregon se marrja e acidit folik gjatë shtatzënisë mund ta ulë rrezikun e sjelljeve të ngjashme me autizmin te fëmijët, nënat e të cilëve ishin ekspozuar ndaj kimikatit plumb, i cili mund të jetë prezent në ajër të ndotur, pluhur, ujë e ushqim. Studiuesit analizuan të dhënat nga gratë shtatzëna dhe fëmijët e tyre dhe zbuluan se marrja e ulët e acidit folik ishte e lidhur me tiparet e autizmit te bebet e nënave që kishin plumb në gjak, shkruan Neuroscience.
-Acidi folik mund të ndihmojë në uljen e rrezikut të autizmit te bebet, nënat e të cilave kanë përmbajtje të plumbit në gjak.
-Lidhje më të forta midis plumbit dhe autizmit u gjetën te nënat me marrje të ulët të acidit folik.
-Dozat më të larta të acidit folik (mbi 1.0 mg në ditë) nuk ofruan mbrojtje shtesë.
Ky hulumtim, i kryer nga Universiteti Simon Fraser (SFU) dhe i udhëhequr nga kandidati për doktoraturë Joshua Alampi, u publikua në revistën Environmental Health Perspectives.
Alampi ka bërë të ditur se konsumimi i acidit folik gjatë shtatzënisë ka shumë përfitime, veçanërisht për zhvillimin e trurit të bebes.
Studimi sugjeron se konsumimi i mjaftueshëm i acidit folik mund të ndihmojë në neutralizimin e efekteve të dëmshme të plumbit.
Ky është studimi i parë që tregon se shtimi i duhur i acidit folik mund të reduktojë rreziqet e lidhura me ekspozimin ndaj plumbit gjatë shtatzënisë. Ai zbuloi se fëmijët e lindur nga nëna që merrnin më pak se 0.4 mg acid folik në ditë kishin lidhje më të forta midis niveleve të plumbit në gjak dhe sjelljeve të ngjashme me autizmin.
Detajet e studimit:
Ekipi i studiuesve analizoi të dhënat nga 2,000 gra kanadeze që morën pjesë në studimin MIREC (Hulumtimi mbi Kimikatet Ambientale në Nënat dhe Fëmijët) nga viti 2008 deri në 2011. Ata matën nivelet e plumbit në gjak gjatë tremujorëve të parë dhe të tretë të shtatzënisë dhe pyetën pjesëmarrëset për marrjen e acidit folik.
Fëmijët u vlerësuan prej moshës tre deri në katër vjeç duke përdorur Shkallën e Reagimit Social (SRS), e cila mat sjelljet e ngjashme me autizmin. Studimi zbuloi se konsumimi i lartë i acidit folik (më shumë se 1.0 mg në ditë) nuk ofroi përfitime shtesë në reduktimin e efekteve të dëmshme të plumbit.
Institucionet shëndetësore në Kanada rekomandojnë që të gjitha shtatzënat ose nënat gjidhënëse të marrin një multivitaminë të përditshme që përmban 0.4 mg acid folik, duke mbështetur gjetjet e studimit.
Përfundim
Ky studim thekson rëndësinë e acidit folik në reduktimin e rreziqeve nga sjellet e ngjashme me autizmin të lidhura me ekspozimin ndaj plumbit gjatë shtatzënisë. Sigurimi i një marrjeje të mjaftueshme të acidit folik mund të promovojë zhvillimin më të shëndetshëm të trurit te fëmijët. /Katror.info
Përgatiti:
