Autoriteti Rregullativ i Komunikimeve Elektronike dhe Postare (ARKEP) në një përgjigje për portalin rtv21.tv në lidhje me sfidat dhe lojërat online në Kosovë nga rrjetet sociale, ka thënë se ofruesit e shërbimeve të qasjes në internet (ISP) gjatë ofrimit të shërbimeve duhet të trajtojnë të gjitha llojet e trafikut në baza jo diskriminuese, pa kufizime.
“Për informim, bazuar në Kornizën rregullatore për net neutralitet, Ofruesit e shërbimeve të qasjes në internet (ISP) gjatë ofrimit të shërbimeve duhet të trajtojnë të gjitha llojet e trafikut në mënyrë të barabartë, në baza jo diskriminuese, pa kufizime ose interferenca, dhe pavarësisht nga dërguesi dhe pranuesi, përmbajtja e qasur ose shpërndar, aplikaconet ose shërbimet e ofruara apo shpërndara, ose pajisja terminale e përdorur”, bëhet e ditur nga ARKEP.
Autoriteti Rregullativ i Komunikimeve Elektronike dhe Postare i ka thënë portalit rtv21.tv se ky dikaster nuk ka kompetenca të monitorimit të përmbajtjeve në rrjetet sociale.
Mundesh me e lexu edhe...
“Ofruesit e shërbimeve të qasjes në internet nuk duhet të përfshihen në masat e menaxhimit të trafikut, të cilat shkojnë përtej masave të arssyeshme të menaxhimit të trafikut, duke bllokuar, ngadalësuar, ndryshuar, kufizuar, ndërhyrë, degraduar ose diskriminuar në mes të përmbajtjeve specifike, aplikacioneve ose shërbimeve, ose kategorive të veçanta, përveç nëse është e nevojshme dhe vetëm për aq kohë sa është e nevojshme. Rrjedhimisht Arkep nuk është kompetent për monitorimin e rrjeteve sociale dhe permbajtjes qe publikohet aty”, thuhet tutje në përgjigjen e ARKEP për portalin rtv21.tv
Javë më parë Agjencia për Informim dhe Privatësi (AIP) në një përgjigje për portalin rtv21.tv, në lidhje me sfidat e fundit të fëmijëve nga rrjetet sociale ka thënë se të gjitha rrjetet sociale që gjejnë përdorim pa kontrollë nga prindërit janë të rrezikshme.
AIP apelon të gjithë prindërit të vendosin masa kontrolluese ndaj fëmijëve për përdorimin e rrjeteve sociale.
“Të gjitha rrjetet sociale të cilët përdoren nga fëmijët pa kontrollin e duhur prindëror janë të rrezikshme. Agjencia në vazhdimësi ka bërë thirrje ndaj prindërve që të vendosin masa kontrolluese ndaj fëmijëve për përdorimin e rrjeteve sociale”, thuhet nga AIP për portalin rtv21.tv /21Media/Katror.info
Përgatiti:
