Fondi i Kursimeve Pensionale të Kosovës (Turst) ka përfunduar vitin 2024 me një kthim bruto rekord nga investimet prej 243.7 milionë euro. Sipas njoftimit të institucionit, kur kësaj shifre i shtohen suficiti i kthyer dhe të ardhurat e tjera prej 3.5 milionë euro, kthimi bruto total për vitin 2024 arrin në 247.2 milionë euro, shkruan Katror.info.
Në njoftim, Trusti thekson se ky është kthimi më i lartë nominal i realizuar ndonjëherë nga investimet, një rezultat që, përveç performancës së mirë financiare, pasqyron edhe rritjen e mjeteve të menaxhuara nga Fondi.
“Ky ishte viti i 20-të, nga gjithsej 23 vite të operimit, që Fondi arrin kthim vjetor pozitiv nga investimet. Që nga themelimi, kthimi i akumuluar bruto ka arritur në 997.2 milionë euro, shumë afër pragut simbolik prej 1 miliard euro,” thuhet në njoftim.
Mundesh me e lexu edhe…
Një tjetër tregues i rëndësishëm financiar për vitin 2024 është arkëtimi i kontributeve të reja, që ka arritur në 315.8 milionë euro. Kjo përfaqëson një rritje prej 29.6 milionë euro në krahasim me vitin e kaluar, ose 10.3% në terma përqindjeje. Sipas Trustit, kjo rritje, e kombinuar me kthimin nga investimet, ka ndihmuar që mjetet neto nën menaxhim të rriten me një shifër rekord prej 480 milionë euro, duke arritur kështu një total prej afër 3.2 miliardë euro.
Në lidhje me strukturën e investimeve, që nga 31 marsi 2024, Trust ka operuar me tre portofola specifike të ndara sipas moshës së kontribuuesve:
- Portofoli Standard: Për kontribuuesit deri në moshën 57 vjeç.
- Portofoli i Ndërmjetëm: Për kontribuuesit nga 58 deri në 62 vjeç.
- Portofoli Konservativ: Për kontribuuesit mbi moshën 63 vjeç.
Këto portofola janë krijuar për të maksimizuar përfitimet për secilin grupmoshë, duke reflektuar një qasje të diferencuar dhe strategji të kujdesshme menaxhimi.
Performanca pozitive e Trustit për vitin 2024 reflekton jo vetëm rritjen e qëndrueshme të ekonomisë, por edhe efikasitetin e menaxhimit të investimeve, duke garantuar siguri dhe stabilitet për të gjithë kontribuuesit e skemës pensionale./Katror.info
Përgatiti:
