Një monedhë përkujtimore që paraqet një imazh të një syri dhe mbishkrimin ‘Big Brother is watching you’ [Vëllai i Madh po të shikon] po lansohet për të nderuar autorin e romanit 1984 (‘Nineteen Eighty-Four’), George Orwell, dhe për të shënuar 75 vjetorin e vdekjes së tij.
Monedha prej £2 [2.40 dollarë] përmban një dizajn që duket si një sy, por në fakt është një lente kamere.
Në skajet e monedhës është gdhendur një tjetër citat nga romani distopik i Orwell-it: “There was truth and there was untruth” [Ishte e vërteta dhe ishte e pavërteta].
Artisti i dizajnit të monedhës, Henry Gray, tha se tema e totalitarizmit ishte qendrore për dizajnin e tij.
“Me telefonat dhe kamerat që gjenden kudo në shtëpinë tuaj, dhe me faktin që reklamuesit dëgjojnë përmes telefonit tuaj, je gjithnjë i vetëdijshëm se si po monitorohesh dhe pikërisht për këtë flet ‘1984’,” tha ai.
“Për këtë arsye syri [në dizajn] nuk është një sy realist. Nuk ka qerpikë apo detaje të tjera sepse dëshiroja që të ishte si një lente e vetme. Është pothuajse si një lente kamere që të vëzhgon vazhdimisht, pa mbyllur kurrë qepallat.”
Romani, i vendosur në një të ardhme imagjinare, përshkruan rebelimin e fshehtë të nëpunësit civil Winston Smith kundër një qeverie totalitare dhe udhëheqësit të saj, Big Brother.
Orwell, i cili është gjithashtu autor i fabulës politike ‘Ferma e Kafshëve’, vdiq në një spital në Londër në moshën 46-vjeçare më 21 janar 1950, disa muaj pasi u publikua ‘Nineteen Eighty-Four’.
Monedha për koleksionistë nga Royal Mint i Mbretërisë së Bashkuar do të lansohet të mërkurën, me çmime që nisin nga 17.50 paund secila.
Figurat e tjera letrare që janë përkujtuar në monedha prej £2 përfshijnë William Shakespeare, Jane Austen dhe J.R.R. Tolkien. /Katror.info
Përgatiti:
