Albumi i ardhshëm ‘Balloonerism‘ i reperit të ndjerë Mac Miller do të publikohet së bashku me një film të shkurtër me të njëjtin emër, sipas një njoftimi të ri.
Balloonerism është albumi i dytë që publikohet pas ndarjes së tij nga jeta në vitin 2018 dhe planifikohet të publikohet të premten (17 janar).
Megjithatë, fansat mund ta përjetojnë gradualisht këtë projekt përmes filmit shoqërues.
I bazuar në tekstet dhe muzikën e Miller dhe i drejtuar nga Samuel Jerome Mason, filmi i animuar Balloonerism ‘tregon historinë e një grupi shokësh shkolle që transformohen nga muzika e një organoje dhe futen në një botë hijesh, të gëlltitur nga breshka e kohës, ata duhet të përballen me sfidat e errëta të moshës madhore’ thuhet në përmbledhjen e filmit.
Një seri shfaqjesh të veçanta ‘One Night Only’ do të mbahen nëpër botë, përfshirë qytetet New York, Pittsburgh, si dhe në Australi, Zelandën e Re, Gjermani, Irlandë, Francë, Kanada dhe Mbretërinë e Bashkuar, shkruan Billboard, përcjell Katror.info.
Në përputhje me temën e albumit të ri, çmimi i biletave është vendosur në 5 dollarë, në linjë me këngën kryesore të albumit, ‘5 Dollar Pony Rides’.
Albumi Balloonerism ka qenë subjekt spekulimesh nga fansat për më shumë se një dekadë, me Miller që e ka regjistruar rreth kohës kur ka punuar në albumin e tij të vitit 2013 ‘Watching Movies with the Sound Off’ dhe mixtapet e tij pasuese, ‘Delusional Thomas’ dhe ‘Faces’.
Pas qarkullimit të disa këngëve në komunitetet e fansave, publikimi zyrtar i albumit u paralajmërua me një trailer në festivalin ‘Camp Flog Gnaw’ në nëntor.
“Besojmë se ky projekt tregon si gamën e gjerë të talenteve muzikore të tij, ashtu edhe guximin e tij si artist,” deklaruan ata.
“Duke pasur parasysh që versionet jozyrtare të albumit kanë qarkulluar online për vite dhe që publikimi i Balloonerism ishte diçka që Malcolm shpesh shprehej se kishte rëndësi, menduam se ishte më e përshtatshme të prezantonim një version zyrtar të projektit për botën” njoftuan ata.
Javën e kaluar, kënga ‘5 Dollar Pony Rides’ u publikua si pararendëse e albumit dhe përfshin Thundercat, mikun dhe bashkëpunëtorin e ngushtë të Miller, që kontribuoi në prodhimin e tij./Katror.info
Përgatiti:
