Si u shndërrua Apple nga një prodhues kompjuterik në vështirësi në një gjigand global? Me një fjalë, iPod.
Prezantimi i luajtësit elegant MP3 në 2001 ngriti në qiell profilin e kompanisë, revolucionarizoi industrinë e muzikës dhe hapi rrugën për iPhone, shkruan INC, transmeton Katror.info.
Por si arriti ai të krijonte ide kaq të fuqishme?
Ndryshe nga ç’mund të mendojmë, Jobs nuk ishte gjithë kohën duke punuar pa pushim në zyrë ose në takime të stërzgjatura. Përkundrazi, shumë prej ideve të tij më të mira vinin kur ai dukej sikur nuk po bënte asgjë. Sipas ish-drejtorit të Twitter, Bruce Daisley, Jobs e vononte punën dhe shpesh “humbiste kohën”. Por pikërisht kjo e bënte atë më kreativ.
Mundesh me e lexu edhe...
Edhe psikologu Adam Grant mbështet këtë ide, duke theksuar se koha që Jobs kalonte duke reflektuar dhe menduar, ishte thelbësore për të sjellë ide të reja dhe të ndryshme në tryezë. Në fakt, kjo qasje është ajo që shumë njerëz krijues dhe inovatorë e përdorin për të arritur rezultate të jashtëzakonshme.
Çfarë është “rregulli i 2 orëve”?
Kjo ide vjen nga shkrimtarja JA Westenberg, e cila përmes një artikulli ndau eksperiencën e saj me “rregullin e 2 orëve”. Në thelb, ky rregull konsiston në krijimin e një hapësirë dyorëshe në ditë, ku nuk i detyroni vetes të jeni produktivë. Në këto dy orë, nuk ka rëndësi nëse shikoni dritaren, pushoni, ose thjesht mendoni pa ndonjë qëllim të caktuar.
Sipas Westenberg, të qenit vazhdimisht të zënë dhe nën presion për të bërë më shumë, pengon krijimtarinë. Në vend të kësaj, duke i dhënë vetes një periudhë kohe për të “mos bërë asgjë”, ju lejoni mendjen tuaj të reflektojë, të relaksohet dhe të sjellë ide më të mira.
Ky koncept nuk është aspak i ri. Shkencëtarë dhe mendimtarë të mëdhenj si Albert Einstein dhe Carlo Rovelli kanë pohuar se shumë nga arritjet e tyre më të mëdha erdhën gjatë periudhave të “kotësisë”. Siç thotë Rovelli, “Nuk arrin askund pa ‘humbur’ kohë.”
Për të vënë në praktikë “rregullin e 2 orëve”, Westenberg rekomandon disa hapa të thjeshtë:
• Trajtoje këtë kohë si një takim të rëndësishëm me trurin tënd.
• Fike telefonin dhe çdo njoftim që të shpërqendron.
• Mos ndihesh fajtor nëse gjatë këtyre orëve thjesht pushon.
• Nëse nuk mund t’i dedikosh dy orë, provo ta fillosh me 30 minuta.
Përfundimi?
Edhe pse mund të mos krijoni një produkt si iPod-i, “rregulli i 2 orëve” mund t’ju ndihmojë të gjeni ide më të mira, të ndiheni më kreativë dhe të përballoni jetën me më pak stres, citon Anabel.
Në një botë ku të qenit i zënë është kthyer në standard, ndoshta ajo që të gjithë kemi nevojë, është të ndalojmë dhe të mendojmë – ashtu si Steve Jobs. /Katror.info
Përgatiti:
