Paneli Zgjedhor për Ankesa dhe Parashtresa (PZAP) ka shqiptuar gjoba në vlerë totale prej 125,000 euro ndaj subjekteve politike për shkelje të rregullave zgjedhore që nga fillimi i fushatës më 11 janar 2025.
Sipas këtij institucioni këto masa ndihmojnë në ruajtjen e integritetit të zgjedhjeve dhe promovojnë një kulturë politike të përgjegjshme dhe të respektueshme ndaj rregullave demokratike.
Në një përgjigje për Telegrafin, PZAP ka theksuar se:”totali i gjobave të shqiptuara ndaj subjekteve politike me vendimet e PZAP-it, deri më tani është 125,000.00 euro.”
Mundesh me e lexu edhe...
Gjobat janë shqiptuar për një sërë rastesh që janë shqyrtuar dhe për të cilat vendimet gjenden në webfaqen zyrtare të PZAP-it.
Rastet e përfshijnë: Anr.27/2025, Anr.28/2025, Anr.30/2025, Anr.32/2025, Anr.34/2025, Anr.35/2025, Anr.37/2025, Anr.48/2025, Anr.49/2025, Anr.50/2025, dhe të tjera deri në Anr.69/2025.
Fushata zgjedhore, e cila do të zgjasë deri më 8 shkurt 2025, ka për qëllim të ofrojë një proces transparent dhe demokratik.
Në këtë drejtim, PZAP ka ndërmarrë masa të rrepta për të garantuar respektimin e standardeve zgjedhore.
Kujtojmë se ditë më parë Demokracia në Veprim (DnV), tha se që nga fillimi i fushatës zgjedhore për zgjedhjet parlamentare të 9 shkurtit është vërejtur gjuhë nxitëse dhe e urrejtjes mbi baza politike, si në tubime politike, por edhe në komente në platforma online.
Në një konferencë për media më 18 janar, Eugen Cakolli nga DnV, tha se gjatë kësaj jave ka pasur përkeqësim të gjuhës së ashpër të përdorur në fushatë.
“Këtë javë kemi pasur ashpërsim e përkeqësim të gjuhës së përdorur në fushatë, me plotë 25 aktivitete gjatë monitorimit të së cilave janë raportuar raste të përdorimit të gjuhës së nxitjes apo urrejtjes, kryesisht mbi baza politike”, tha ai.
Zgjedhjet parlamentare do të mbahen më 9 shkurt 2025, ku në garë janë 28 subjekte politike dhe një kandidat i pavarur.
Këto do të jenë zgjedhjet e para të rregullta që Kosova mban që nga shpallja e pavarësisë më 2008. Deri më tani, në vend janë mbajtur një sërë zgjedhjesh të parakohshme.
Për më shumë informacione mbi vendimet e fundit të PZAP-it, mund të vizitoni faqen e tyre zyrtare. /Katror.info
Përgatiti:
