Në fund të dhjetorit të kaluar u bë e ditur se Kosova është përfshirë zyrtarisht në platformën e Amazon-it si një vend nga mund të porositen dhe të dërgohen produktet. Megjithatë, blerja e të gjtiha produkteve përmes Amazon-it mbetet ende në proces të zhvillimit, pasi përfshirja e Kosovës është realizuar vetëm pjesërisht.
Aktualisht, disa produkte si librat janë të disponueshme për dërgesë, por zgjerimi i shërbimeve të tjera është ende në pritje. Amazon, një nga platformat më të mëdha të tregtisë elektronike në botë, ofron produkte dhe shërbime për miliona konsumatorë globalisht.
Në një përgjigje përmes e-mail-i për katror.info, përfaqësuesit e kompanisë Amazon shpjeguan se “ata janë duke punuar për t’u ofruar shërbime konsumatorëve të tyre në mbarë botën, përfshirë edhe Kosovën.” Ata kanë shpjeguar se jo të gjitha produktet ofrohen njëjtë për vendet e ndryshme, “por ka produkte si libra dhe materiale të tjera që mund të dërgohen në Kosovë.”
Mundesh me e lexu edhe…
Megjithatë, nuk ka një deklaratë zyrtare apo afat të përcaktuar për zgjerimin e shërbimeve të tyre në vend.
Kosova u pranua në Amazon në dhjetor të vitit 2024, duke u përfshirë zyrtarisht në të gjitha platformat e saj. Kjo u bë e ditur përmes një njoftimi të përbashkët nga Zyra e Presidencës dhe Oda Ekonomike Amerikane, ku u tha se “kjo arritje erdhi si rezultat i takimeve të nivelit të lartë të mbajtura në tetor 2024, ndërmjet presidentes së Kosovës, Vjosa Osmani-Sadriu dhe përfaqësuesve të gjigantit teknologjik Amazon në Washington D.C. në SHBA.”
Katror.info i ka dërguar pyetjet ne adresë të Presidencës së Kosovës për të parë se kur do të ketë zgjerim të ofrimit të produkteve edhe në Kosovës, por deri në publikimin e këtij artikulli nuk ka marrë përgjigje.
Në një kohë kur kërkesa për blerje online dhe integrimi me tregtinë ndërkombëtare po rritet, mungesa e shërbimeve të plota të Amazon-it në vend mbetet një sfidë. Mungesa e Amazon-it në Kosovë ka bërë që konsumatorët të gjejnë zgjidhje alternative, duke përdorur platforma të tjera të tregtisë elektronike ose ndërmjetës për të porositur produkte.
Rasti i Amazon-it dhe Kosovës tregon sfidat me të cilat përballen tregjet e vogla për të tërhequr gjigantët globalë të teknologjisë dhe tregtisë. /Katror.info
Përgatiti:
