Në Kroaci, më 24 janar 2025, qytetarët organizuan një bojkot të dyqaneve, rrjeteve të shitjes me pakicë dhe stacioneve të karburantit, në shenjë proteste ndaj rritjes së vazhdueshme të çmimeve, shkruan Katror.info.
Kjo nismë u iniciua nga grupi në Facebook “Halo, inspektore” dhe u mbështet nga Qendra Evropiane e Ekselencës për Mbrojtjen e Konsumatorëve (ECIP), si dhe nga shoqata të tjera të konsumatorëve, sindikata, parti politike dhe vetë Ministri i Ekonomisë, shkruan Katror.info.
Mesazhet që qarkulluan në rrjetet sociale inkurajonin qytetarët që të mos kryenin asnjë blerje gjatë kësaj dite, duke u përgatitur sikur të ishte një ditë pushimi. Sipas raportimeve të mediave lokale, si “Index.hr”, mëngjesin e 24 janarit, shumë dyqane, furra buke dhe lokale në Zagreb ishin pothuajse bosh, duke reflektuar pjesëmarrjen e gjerë të qytetarëve në këtë bojkot.
Kjo protestë pason shqetësimet e qytetarëve kroatë lidhur me rritjen e çmimeve të ushqimeve dhe produkteve të tjera esenciale, veçanërisht pas adoptimit të euros si monedhë zyrtare më 1 janar 2023, që ka kontribuar në rritjen e kostove të jetesës.
Organizatorët e bojkotit shpresojnë se kjo nismë do të dërgojë një mesazh të fortë tek tregtarët dhe autoritetet për të adresuar çështjen e çmimeve të larta dhe për të marrë masa në mbrojtje të konsumatorëve./Katror.info
Përgatiti:
