Sipas Parks Australia, migrimi i gaforreve të kuqe në Ishujt e Krishtlindjeve këtë vit pritet të shohë 65 milionë krijesa, që do të kalojnë rrugën nga pyjet tropike të shiut drejt bregut me rërë.
Menaxheri i specieve vendase të ishullit, Derek Ball, tha se migrimi i këtij viti mund të jetë më i madhi në vite.
Reshjet e dendura të shiut të shtunën e kaluar nisën “paradën” e gaforreve të kuqe në të gjithë ishullin, ku disa rrugë tashmë janë mbyllur për t’u mundësuar atyre një kalim të sigurt në rrugëtimin e tyre.
Mundesh me e lexu edhe…
Fotografi i kafshëve të egra dhe pronari i Swells Lodge, Chris Bray, tha se kur banorët e ishullit u zgjuan nga gjumi, ishulli ishte “mbuluar me të kuqe nga gaforret”.
“Të nesërmen në mëngjes kishte miliona gaforre që sapo dolën nga strofullat në të gjithë ishullin,” tha ai.
I gjithë procesi i migrimit zgjat rreth tre muaj dhe fillon me udhëtimin në bregdet, ku meshkujt gërmojnë një strofull për t’u shumuar. Femrat qëndrojnë nën rërë për inkubacion, përpara se t’i lëshojnë vezët e tyre në oqean kur batica është e drejtë.
Z. Ball tha se dhjetëra miliona gaforre janë tashmë në lëvizje. “Kanë kaluar vetëm disa ditë, por sigurisht duket se ky do të jetë një migrim i madh,” tha ai.
Z. Ball tha se popullsia e gaforreve ishte rimëkëmbur vitet e fundit, për shkak të kontrollit të dëmtuesve.
“Këto shifra janë përafërsisht dyfishuar nga sa ishin pesë apo gjashtë vjet më parë. Kjo ndoshta është kryesisht për shkak të faktit se ne kemi qenë në gjendje të shtypim speciet pushtuese si milingonat, të cilat vrasin gaforret, për fat të keq,” tha ai.
Milingonat e verdha kanë vrarë miliona gaforre të kuqe që kur u futën aksidentalisht në ishull në vitet 90-ta.
Milingonat spërkasin acid në sytë dhe nyjet e këmbëve të gaforreve për t’i neutralizuar ato, përpara se t’i hanë.
Zoti Bray tha se të jesh dëshmitar i një migrimi të tillë të gaforreve të kuqe është një gjë spektakolare, proces që nxitë turizmin në ishull, por që shuhet pas disa javësh, për shkak të problemeve që shkakton në jetën e përditshme.
“E bën jetën shumë më të vështirë në qytet për të bërë gjërat normale, si p.sh. të ecësh me makinë deri në dyqan. Ka menaxhim trafiku ose roje të parkut kombëtar, duke formuar kolona makinash për të kufizuar rrjedhën e trafikut mbi zonat e gaforreve”, theksoi Bray./Katror.info
Përgatiti:
