Ylli i rock-ut e quajti të drejtën e autorit ‘themeli absolut i mirëqenies artistike’, përpara një votimi mbi një ligj që u jep kompanive të inteligjencës artificiale qasje më të lehtë në veprat e muzicientëve.
Elton John mbështet Paul McCartney në kritikimin e reformës së propozuar të sistemit të të drejtave të autorit në Mbretërinë e Bashkuar dhe kërkon rregulla të reja për të parandaluar që kompanitë teknologjike të shkelin mbi ligjet tradicionale të të drejtave të autorit, të cilat mbrojnë jetesën e artistëve, shkruan The Guardian, transmeton Katror.info.
John ka mbështetur amendamentet e propozuara për ligjin mbi të dhënat (përdorimin dhe qasjen), të cilat do të zgjatnin mbrojtjet ekzistuese të të drejtave të autorit, kur të dalë për votim në Dhomën e Lordëve.
Qeveria po shqyrton gjithashtu një reformë të ligjeve të të drejtave të autorit që do të detyronte artistët të përjashtoheshin nëse nuk duan që kompanitë e inteligjencës artificiale, të trajnojnë modelet e tyre duke përdorur veprat e tyre, në vend të një modeli ku ata duhet të japin pëlqimin paraprak.
Paul McCartney tha e ndryshimet e propozuara mund të dekurajojnë shkrimtarët dhe artistët dhe të çojnë në një ‘humbje të kreativitetit’.
Ish-Beatle tha: “Ke djem të rinj, vajza të reja, që vijnë dhe shkruajnë një këngë të bukur, dhe ata nuk e zotërojnë, dhe nuk kanë asgjë të bëjnë me të. Dhe kushdo që do, mund ta vjedhë pa problem.”
“E vërteta është, paratë po shkojnë diku, dikush po paguhet, atëherë pse nuk duhet të jetë ai që u ul dhe shkroi Yesterday?”, theksoi grupi.
John tha për The Sunday Times se ai ndjen se “janë vënë në lëvizje mekanizma që do të lejojnë kompanitë e AI- të shkelin mbi ligjet tradicionale të të drejtave të autorit që mbrojnë jetesën e artistëve.
”Kjo do t’u japë kompanive të mëdha teknologjike globale qasje të lirë dhe të lehtë në veprat e artistëve për të trajnuar inteligjencën e tyre artificiale dhe për të krijuar muzikë konkurruese. Kjo do të ulë dhe kërcënojë të ardhurat e artistëve të rinj edhe më tej. Komuniteti i muzikantëve e refuzon plotësisht këtë gjë”, tha ai.
Ai shtoi se “situatat financiare sfiduese” dhe kostot e shtuara të turneve e bëjnë “më të vështirë se kurrë që muzikantët e rinj dhe ata në fillimet e tyre të bëjnë që financat e industrisë të funksionojnë për të mbajtur një karrierë të re”.
Ai shtoi se pozita e Mbretërisë së Bashkuar si “një lider në art dhe kulturë popullore është seriozisht në rrezik” pa mbrojtje të fortë të të drejtave të autorit.
“Kjo është themeli absolut i mirëqenies artistike, dhe suksesi i ardhshëm i vendit në industritë kreative varet prej tij”, theksoi ai.
Konsultimi i qeverisë zgjat deri më 25 shkurt dhe do të eksplorojë si të përmirësohet besimi midis sektorëve krijues dhe AI, dhe si krijuesit mund të licencojnë dhe të paguhen për përdorimin e materialit të tyre.
Një zëdhënës i qeverisë tha: “Qëllimi ynë është të ofrojmë siguri ligjore përmes një regjimi të të drejtave të autorit që u jep krijuesve kontroll të vërtetë, transparencë, dhe i ndihmon ata të licencojnë përmbajtjen e tyre.
Jemi të gatshëm të dëgjojmë pikëpamjet e industrisë muzikore mbi këto propozime, dhe nuk do të marrim asnjë vendim derisa të jemi plotësisht të bindur se po ofrojmë qartësi, kontroll dhe transparencë për artistët dhe sektorin, së bashku me qasje të përshtatshme në të dhëna për inovatorët e inteligjencës artificiale.
“Ne jemi njerëzit, ju jeni qeveria. Duhet të na mbroni. Ky është roli juaj. Pra, nëse po kaloni një ligj, sigurohuni që të mbroni mendimtarët krijues, artistët krijues, ndryshe nuk do t’i keni më”, tha McCartney.
Në vitin 2023, McCartney dhe Ringo Starr krijuan këngën Now And Then duke përdorur teknologjinë AI për të ndarë vokalin e John Lennon-it nga një demo e regjistruar në shtëpi në vitin 1977.
Në dhjetor 2024, McCartney paralajmëroi se AI mund “thjeshtë të marrë kontrollin”, dhe nënshkroi një peticion, së bashku me aktorët Julianne Moore, Stephen Fry dhe Hugh Bonneville, duke deklaruar se “përdorimi i paautorizuar i veprave krijuese për të trajnuar AI gjeneruese është një kërcënim i madh dhe i padrejtë për jetesën e njerëzve pas këtyre veprave dhe nuk duhet të lejohet.” /Katror.info
Përgatiti:
