Qeveria e SHBA-së pohon se aplikacionet dhe aktivitetet online kineze paraqesin një kërcënim për sigurinë e amerikanëve, megjithatë përdoruesit amerikanë të internetit nuk po mjaftohen me humorin kinez.
Glicina industriale e klasës ushqimore nuk është një temë që normalisht do të priste të ngjallte imagjinatën e dikujt. Megjithatë, që nga vera e vitit 2024, një prodhues kinez i aminoacideve është gjendur në qendër të një sensacioni në TikTok në SHBA.
Përdoruesit amerikanë të kësaj platforme sociale janë fiksuar pas postimeve të kompanisë Donghua Jinlong, duke i shndërruar ato në meme tepër të njohura, ndërsa kompania vetë ka luajtur me finesë me këtë trend. Kështu, fama e glicinës industriale kineze u përhap me shpejtësi, shkruan BBC, transmeton Katror.info.
Mundesh me e lexu edhe…
Në javët e fundit, përballë një ndalimi të afërt të TikTok-ut në SHBA, amerikanët vërshuan në numër të habitshëm drejt një tjetër aplikacioni të njohur kinez të mediave sociale të quajtur RedNote, i njohur gjithashtu si Xiaohongshu, që në përkthim të drejtpërdrejtë do të thotë “Libri i Vogël i Kuq”.
Rreth tre milionë përdorues në SHBA u regjistruan në RedNote në ditët para se një ligj për ndalimin e TikTok-ut, mbi shqetësimet për sigurinë kombëtare, të hynte përkohësisht në fuqi, përpara se presidenti Donald Trump t’i jepte atij një pezullim 75-ditor.
Këta të vetëshpallur “refugjatë të TikTok-ut” iu bashkuan rreth 300 milionë përdoruesve aktivë të Xiaohongshu, të cilët ndodhen kryesisht në Kinë, duke krijuar një lidhje të re mes qytetarëve kinezë dhe amerikanë, të cilët shkëmbyen meme dhe madje ndihmuan njëri-tjetrin me detyrat e shkollës.
Kjo po ndodh në një periudhë kur tensionet mes SHBA-së dhe Kinës janë veçanërisht të larta, mes shqetësimeve për sigurinë kombëtare dhe frikës për një luftë tregtare midis dy vendeve.
E megjithatë, mediat sociale duket se po u ofrojnë qytetarëve amerikanë dhe kinezë një mundësi për të kapërcyer “Murin e Madh Digjital” që zakonisht ndan aktivitetet e tyre në internet.
Por a mund të jetë kjo përplasje mes dy kulturave të pasura, por krejt të ndryshme të memeve, diçka më shumë se thjesht argëtim? Dhe a mund të shërbejë si një pikë takimi mes njerëzve që shpesh ndahen nga retorika e udhëheqësve të tyre politikë?
Ndërsa migrimi drejt RedNote është një fenomen i ri, magjepsja e amerikanëve me memet kineze nuk është e tillë
Në vitin 2024, batutat dhe përmbajtja kineze shpërthyen në kulturën dixhitale amerikane në një mënyrë të çuditshme dhe të papritur.
Gjatë verës, “glycine girlies” (vajzat e glicinës) e shndërruan prodhuesin industrial të glicinës Donghua Jinlong, me bazë në Hebei, në një fenomen të paparashikuar të famës.
Glicina është një aminoacid që gjendet në produkte të ndryshme ushqimore. Ndërkohë, krijuesit e memeve u magjepsën edhe nga videot e çuditshme rreth një personazhi të quajtur “Little John,” i cili përdorte trarë çeliku të galvanizuar për të realizuar rinovime absurde në shtëpi, një shaka e përsëritur që fillimisht e kishte origjinën në platformën kineze BiliBili.
Ndoshta keni dëgjuar për frazën ‘you swan, he frog’?
Në gusht 2024, influencuesja YourKris publikoi një postim në RedNote, ku diskutonte problemet e saj në një lidhje. Ajo u përball me një lumë komentesh mbështetëse nga përdoruesit kinezë, të cilët përdorën frazën “you swan, he frog”.
Kjo idiomë e përkthyer fjalë për fjalë u adoptua nga amerikanët online për të përshkruar gjithçka, nga marrëdhëniet e VIP-ave deri te kandidatët politikë.
Një meme që kaloi kufijtë
Popullariteti i memeve kineze tregon se përdoruesit amerikanë po shfaqin një interes të shtuar për Kinën, pikërisht në një kohë kur tensionet mes dy vendeve, veçanërisht në fushën e teknologjisë, janë në kulmin e tyre. Megjithatë, ky fenomen po sjell ndërveprime të papritura që sfidojnë narrativën gjeopolitike.
Vlen të theksohet se, ndonëse amerikanët gëzojnë lirinë e shprehjes, qytetarët kinezë nuk kanë të njëjtin nivel lirie, pasi disa fraza dhe tema janë të censuruara në platformat e mediave sociale dhe aplikacionet e mesazheve.
Sipas disa krijuesve amerikanë që ndajnë përmbajtje kineze online, arsyeja pse kjo përmbajtje ka sukses është e njëjta arsye pse çdo përmbajtje tjetër ka sukses: është qesharake, e krijuar mirë dhe duket autentike.
Donghua Jinlong, prodhuesi i glicinës nga Hebei, u kthye në një meme pasi një nga videot e tij reklamuese u bë viral në TikTok në mes të vitit 2024.
Marketingu i tij i gëzueshëm për një produkt industrial që në fakt nuk është i disponueshëm për konsumatorët e zakonshëm u duk absurd për shumë njerëz.
“E pamë atë video dhe të gjithë menduam njëkohësisht: kjo është një fenomen,” thotë Diana R, krijuesja e faqes popullore të memeve citiesbydiana.
“E kaluam një muaj të tërë duke bërë sikur po blinim kimikate industriale nga Kina dhe duke krijuar video në stilin e influencuesve për një produkt që shitet vetëm biznes-me-biznes”, shton ajo.
Politika dhe humori në internet
“Kina është vendi që ne supozohet ta urrejmë,” shpjegon Diana.
“Qeveria na ka thënë ta urrejmë. Por unë nuk kam frikë prej tyre. Ky është një deklarim politik. Ata janë si ne, dhe ne e dimë që janë si ne. Kultura dhe gjuha janë të ndryshme, por në fund të ditës, të gjithë qeshim me të njëjtat budallallëqe”, thotë ajo.
Pas ndalimit të TikTok-ut, përdoruesit amerikanë dhe kinezë në RedNote bënë shaka mbi idenë e spiunimit të njëri-tjetrit dhe përpjekjet e qeverive të tyre për t’i ndarë.
“Narrativat e mëdha politike e humbasin fuqinë e tyre në nivelin e ndërveprimit të përditshëm,” thotë Jianqing Chen, studiues i gjuhëve dhe kulturave të Azisë Lindore në Washington University në St. Louis.
“Ndërveprimi personal dhe i drejtpërdrejtë përmes mediave sociale u mundëson përdoruesve të shohin përtej tensioneve gjeopolitike dhe të njohin përvojat e përbashkëta njerëzore”, shton ai.
Screenshot-e të bisedave midis qytetarëve kinezë dhe amerikanë në RedNote tregojnë se edhe ndërveprimet më të zakonshme kanë krijuar një ndjenjë kurioziteti në të dy vendet.
Disa përdorues kanë diskutuar mbi kostot e kujdesit shëndetësor ose detyrat e shtëpisë për gjuhën angleze, ndërveprime që janë bërë virale në X. Po ashtu, këngët kineze kanë filluar të bëhen virale edhe në pjesën anglishtfolëse të TikTok-ut.
Amerikanët kanë pasur gjithmonë kuriozitet për atë që ndodhet përtej “Murit të Madh Digjital”, term që i referohet censurës së rreptë të internetit në Kinë.
Angazhimi i tyre me memet kineze ndodh brenda një konteksti ndarjesh teknologjike dhe kufizimesh ligjore mes dy vendeve, thotë Chen.
“Platformat e Web 2.0 duken të hapura dhe të lidhura, por në të vërtetë funksionojnë si ekosisteme të mbyllura që krijojnë barriera të padukshme mes përdoruesve”, thotë ai.
RedNote, një nga platformat e pakta kineze të lejuara për përdorim jashtë Kinës, është bërë një portë hyrëse për amerikanët drejt kulturës kineze të internetit.
“Përdoruesit e Xiaohongshu krijojnë përmbajtjen më të jashtëzakonshme që kam parë ndonjëherë. Kam mësuar si të jem më kreativ prej tyre dhe më frymëzojnë jashtë mase,” thotë Rick, një amerikan që poston video në TikTok nën emrin Prognoz Pogodi.
Ashtu si çdo formë arti, ‘memes’ i tregojnë botës sesi ajo duket nga sytë e dikujt tjetër.
Dhe nëse pasioni i përdoruesve amerikanë të rrjeteve sociale për memet kineze tregon diçka, është se kurioziteti vazhdon të mbetet një forcë kryesore që formëson kulturën e internetit, pavarësisht platformës ku ndodhi./Katror.info
Përgatiti:
