Një anestetik i përgjithshëm është zbuluar se ka një efekt shtesë të mundshëm: stimulimin e një mbrojtjeje neuroproaktive kundër sëmundjes së alzheimerit.
Ksenoni është një gaz fisnik pa ngjyrë dhe pa erë, i përdorur në shumë fusha shkencore, por një studim i fundit te minjtë ka treguar se ai stimulon sistemin imunitar të trurit, i cili mund të ndihmojë në mbrojtjen kundër alzheimerit. Rezultatet kanë treguar reduktim të inflamacionit nervor, ngadalësim të atrofisë së trurit dhe mbrojtje të qelizave nervore, shkruan The Optimist Daily, transmeton Katror.info.
Alzheimeri është sëmundja neurodegjenerative më e përhapur te njerëzit. Besohet se shkaktohet nga akumulimi i proteinave toksike tau dhe beta-amiloid në tru. Edhe pse ekzistojnë ilaçe që ndihmojnë në eliminimin e këtyre proteinave, ato nuk kanë arritur të ngadalësojnë përparimin e sëmundjes. Për këtë arsye, as shkaktari i saktë dhe as kura nuk janë ende të kuptuara plotësisht.
Mundesh me e lexu edhe...
Mikroglia, qelizat më të zakonshme imune të trurit, luajnë një rol kyç në parandalimin e rënies kognitive gjatë jetës. Së bashku me lëngun cerebrospinal, ato ndihmojnë në pastrimin e proteinave tau dhe beta-amiloid.
Në një eksperiment laboratorik të kryer në spitalin Brigham and Women’s, gazi ksenon u testua në dy grupe minjsh: njëri kishte një nivel të lartë të proteinës tau dhe tjetri të proteinës beta-amiloid. Gazi, i cili mund të kalojë barrierën gjak-tru, tregoi një efekt të dukshëm: minjtë u bënë më aktivë dhe filluan të ndërtonin e të mirëmbanin foletë e tyre më me energji. Pas eksperimentit, analizat treguan se gazi kishte stimuluar një përgjigje mbrojtëse të mikroglisë, të ngjashme me atë që ndihmon në eliminimin e proteinave të dëmshme.
“Është një zbulim shumë inovativ që tregon se thjesht thithja e një gazi inert mund të ketë një efekt të thellë neuroprotektiv,” tha Oleg Butovsky, drejtor i laboratorit ku u krye studimi. “Një nga kufizimet më të mëdha në kërkimin dhe trajtimin e alzheimerit është vështirësia për të krijuar medikamente që mund të kalojnë barrierën gjak-tru—por ksenoni e bën këtë. Me padurim presim të shohim këtë qasje të re të testohet te njerëzit.”
“Është emocionuese që në dy modele të ndryshme të sëmundjes, njëra me akumulim të beta-amiloidit dhe tjetra me tau, ksenoni ka treguar efekte mbrojtëse në të dyja rastet,” shtoi David M. Holtzman, një nga bashkautorët e studimit.
Aktualisht, po rekrutohen vullnetarë të shëndetshëm për një testim klinik të fazës së parë për të vlerësuar dozimin dhe sigurinë e trajtimit me ksenon. Ndërkohë, ekipi kërkimor po zhvillon teknologji për ta përdorur gazin në mënyrë më efikase dhe për ta ricikluar atë. /Katror.info
Përgatiti:
