Nga 1 janari 2025, qytetarët e Prishtinës nuk janë të obliguar të paguajnë faturat e mbeturinave ndaj KRM “Pastrimi”. Ky ishte njoftimi i Komunës së Prishtinës, i cili ka shkaktuar reagime të forta nga kompania publike e menaxhimit të mbeturinave.
Thirrja e “Pastrimit”: Qytetarët të vazhdojnë pagesat
KRM “Pastrimi” e ka cilësuar këtë vendim të jashtëligjshëm dhe arbitrar, duke e akuzuar komunën për shkelje ligjore dhe krijim të konfuzionit mes qytetarëve, shkruan Katror.info.
“Pastrimi” ka dënuar vendimin e Komunës së Prishtinës, duke argumentuar se ai bie në kundërshtrim me rregulloren për menaxhimin e mbeturinave, e cila është miratuar nga Kuvendi Komunal dhe aprovuar nga Ministria e Mjedisit dhe Planifikimit Hapësinor.
Mundesh me e lexu edhe...
“Ky njoftim është bërë pa asnjë bazë ligjore dhe bie në kundërshtrim me rregulloren për menaxhimin e mbeturinave,” thuhet në reagimin e “Pastrimit”. Sipas kompanisë, nuk ka asnjë vendim nga ndonjë organ kompetent gjyqësor që pezullon rregulloren ekzistuese, dhe ky veprim i komunës dëmton funksionimin e shërbimeve publike.
“Një veprim i tillë nuk ka për qëllim përmirësimin e shërbimeve, por vetëm krijimin e një situate kaotike për të justifikuar dhënien e një tenderi 16 milionësh një kompanie private,” ka deklaruar kompania, duke aluduar në tenderin e shpallur nga Komuna e Prishtinës.
Duke e konsideruar vendimin e Komunës si të pabazuar ligjërisht, KRM “Pastrimi” ka bërë thirrje që qytetarët të mos bien pre e konfuzionit të krijuar. “Ftojmë të gjithë qytetarët që të mos bien pre e këtij manipulimi dhe të vazhdojnë pagesat e tyre ndaj KRM ‘Pastrimi’, siç është përcaktuar në rregulloren e miratuar ligjërisht,” thekson kompania.
Komuna e Prishtinës përmes një vendimi ka njoftuar qytetarët se, duke filluar nga 1 janari 2025, faturat për grumbullimin e mbeturinave të lëshuara nga KRM “Pastrimi” nuk janë të obliguar t’i paguajnë. “Nga tani e tutje, pagesat për këtë shërbim duhet të realizohen përmes Komunës së Prishtinës deri në një vendim të ri,” thuhet në njoftimin e komunës.
Një krizë që thellohet
Ndërkaq kujtojmë se më 3 shkurt 2025, Komuna e Prishtinës shpalli gjendje të jashtëzakonshme për menaxhimin e mbeturinave, pas përkeqësimit të kushteve të pastrimit të qytetit.
E gjithë kjo mosmarrëveshje mes Kompanisë “Pastrimi” dhe Komunës së Prishtinës nisi kur para dy muajsh, Komuna e Prishtinës shpalli një tender në vlerë prej 16.4 milionë eurosh për menaxhimin e mbeturinave në kryeqytet, një veprim që ka shkaktuar shqetësime të mëdha tek punëtorët e Ndërmarrjes Publike Rajonale KRM “Pastrimi”. Ata kanë protestuar para Komunës, duke kërkuar anulimin e tenderit dhe shprehur frikën se ky veprim mund të çojë në falimentimin e kompanisë dhe humbjen e vendeve të punës për rreth 900 punëtorë.
Në përgjigje, Komuna e Prishtinës u shpreh se angazhimi i operatorëve privatë dhe furnizimi me kontejnerë të rinj kanë përmirësuar menaxhimin e mbeturinave dhe se ky veprim nuk ka për qëllim falimentimin e “Pastrimit”. Ata kanë akuzuar se pastrimi i kryeqytetit po sabotohet për arsye politike dhe kanë shprehur keqardhje për politizimin e këtij shërbimi thelbësor.
Për më tepër, punëtorët e “Pastrimit” kanë kërkuar që Komuna të ndalojë tenderin dhe të investojë në rinovimin e mjeteve të punës, pasi aktualisht po punojnë me mjete të vjetra. Ata kanë kërkuar që Komuna të ofrojë mbështetje për kompaninë dhe të sigurojë që punëtorët të mos mbesin pa të ardhura.
Si përgjigje, Komuna është shprehur se angazhimi i operatorëve privatë është një mbështetje për “Pastrimin” dhe jo një zëvendësim i saj, dhe se do të vazhdojë të mbështesë këtë ndërmarrje publike rajonale./Katror.info
Përgatiti:
