Biblioteka Kombëtare e Kosovës ka nisur një bashkëpunim me Bibliotekën e Kongresit të Shteteve të Bashkuara përmes programit ndërkombëtar të shkëmbimit, Duplicate Materials Exchange Program (DMEP).
Sipas njoftimit në rrjetet sociale, ky program do të mundësojë shkëmbimin e librave, monografive, revistave dhe materialeve të tjera akademike, me fokus të veçantë në shkencat shoqërore, shkruan Katror.info.
Ky hap është mundësi e rëndësishme për pasurimin e koleksioneve të bibliotekës dhe rritjen e bashkëpunimit ndërkombëtar në fushën e shkencës dhe kulturës.
“Në takimin e mbajtur më 5 shkurt 2025, përfaqësues nga Biblioteka e Kongresit dhe Biblioteka Kombëtare e Kosovës, drejtoresha e përgjithshme e BKK-së, Dr.Blerina Rogova Gaxha dhe zv.drejtoresha e Departamentit të Zhvillimit të Koleksioneve Lavdie Mani, u dakorduan për fillimin e këtij bashkëpunimi, duke nisur me përzgjedhjen e materialeve të para për shkëmbim nga të dyja palët. Ky hap do të mundësojë ndërtimin e një baze të fortë për zhvillimin e mëtejshëm të programit dhe pasurimin e fondeve të të dy institucioneve”, thuhet në njoftim për medie.
Po ashtu siç bëhet e ditur në njoftim Biblioteka e Kongresit ka shprehur një interes të veçantë për pasurimin e fondit të saj me materiale nga Kosova të cilat reflektojnë gjendjen në Kosovë, me synimin për të ndërtuar një koleksion të veçantë kushtuar vendit tonë. Kjo nismë jo vetëm që forcon lidhjet akademike mes dy institucioneve, por gjithashtu rrit njohjen ndërkombëtare të kulturës, historisë dhe zhvillimeve sociale në Kosovë.
Ndër të tjera në njoftim thuhet se ky bashkëpunim do t’u japë studiuesve dhe lexuesve ndërkombëtarë qasje më të gjerë në botimet nga Kosova, duke ndihmuar në ruajtjen dhe promovimin e trashëgimisë intelektuale të vendit./Katror.info
Përgatiti:
