Blerina Kllokoqi Rugova, kreatorja e njohur shqiptare, është përzgjedhur për të dizajnuar uniformat e reja të Ushtrisë së Kosovës.
Ajo e ndau këtë lajm përmes një videoje në Instagram, ku shprehu krenari dhe entuziazëm për këtë arritje të rëndësishme.
Kreatorja e brendit ‘Bukur’, Blerina Kllokoqi Rugova, bëri të ditur këtë arritje pikërisht në dyvjetorin e brendit, duke e cilësuar si fryt të një rrugëtimi të mbushur me pasion, kreativitet dhe përkushtim.
Mundesh me e lexu edhe...
“Me krenari ju njoftojmë se ‘Bukur’ është përzgjedhur për të dizajnuar uniformat e Ushtrisë së Republikës së Kosovës. Për ne si brend, kjo është një nder i madh dhe një arritje historike. Jemi të parët në rajon që na është besuar një projekt i tillë, dhe kjo tregon se krijimtaria dhe cilësia jonë janë njohur edhe në nivelet më të larta. Këto uniforma do të jenë pjesë e rrugëtimit të Kosovës drejt NATO-s, duke na vendosur në një nivel të ri. Pra, kjo është një dëshmi se vizioni dhe përkushtimi sjellin suksese të mëdha. Ju falënderojmë nga zemra për mbështetjen tuaj të vazhdueshme”, tha ajo.
Ky projekt është një dëshmi e fuqisë së punës, përkushtimit dhe kreativitetit, vlera të cilat tashmë janë të njohura dhe të vlerësuara në Kosovë.
Ky moment për Blerina Kllokoqi Rugovën nuk është vetëm një arritje personale, por gjithashtu një hap i rëndësishëm për industrinë e modës shqiptare.
Ajo po vërteton se punët e realizuara me pasion dhe përkushtim mund të çojnë në projekte të rëndësishme shtetërore dhe ndërkombëtare, duke sjellë një shembull të mirë të mundësive që u hapen grave dhe profesionistëve të rinj në Kosovë. /Katror.info
Përgatiti:
